Guardo nabalaka sa kontrobersiya

Nabalaka si Greater Cebu Sports Organizing Committee (GCSOC) chairman Jonathan Guardo sa giatubang karon nga problema kabahin sa sports of chess sa milabay'ng mga adlaw.

Si Guardo naila nga mahigmaong mopaluyo og chess tournaments sa nangaging mga katuigan. Nisuporta sab siya sa bag-o lang natapos nga Congressman Prospero 'Butch' Pichay Sinulog Chess Open tournament ug mopahigayon sab siya og Atan Guardo Sinulog Cup sa tapos ning semanaha.

Si GM Mark Paragua usa sa nalambigit sa game-fixing controversy uban nilang International Masters Ronald Dableo ug Darwin Laylo.

Ang 22-anyos nga si Paragua, mibutyag nga andam siyang moatubang sa National Chess Federation the Philippines (NCFP) board aron ipamatuod nga inosente siya sa maong kontrobersiya.

Si Paragua, ang 1988 world rapid under-14 champion wala sab mahimutang sa niulbo nga kontrobersiya nga dili lamang ang iyang performance nga naapektohan kondili ang iya usab nga pamilya.

Ning bag-o, si Guardo misaad nga iyang paluyohan ang monthly chess tournament uban ni Boogie Lim sa Rose Pharmacy.

Ang Atan Guardo Sinulog Cup himuon karong Enero 27-28 diha sa Robinson's Place.

Matud pa ni GCSOC Executive Director Allan Torrevilias nga naggahin sila og P20 mil alang sa maong torneyo.

Ang kampiyon mobulsa og P5,000, ang second placer mobitbit og P4,000 ug ang third placer makadawat og P3,000.