Jandaeng moabot ugma aron harungon si Banal

Ang Thai boxer nga si Terdkiat Jandaeng moabot dinhi sa Sugbo ugma sa alas-8:00 sa gabii aron iyang hamagon si ALA Boxing Gym prodigy Alex John 'Bazooka' Banal sa 10-round rumble karong Sabado diha sa Mandaue City Sports and Cultural Complex.

Si Jandaeng adto kini ipahiluna sa Metropolis Hotel ug gipaabot nga makigbayloay pa una kini og mga pulong ni Banal sa pre-fight news conference unya sa Huwebes o dili ba sa Biyernes sa wala pa masayring binyu.

Sila si Jandaeng ug Banal maoy sentro sa main event sa SGG Sports Promotions' slambang Sinulog presentation nga mao sab ang third installment sa "Stars of the Future" boxing series sa Solar Sports.

Seguradong ang Bol-anong si Banal makasugat og makuti nga away tungod kay ang iyang ikasangka mao man ang WBO Asia Pacific ranked No. 6 flyweight contender Jandaeng, kinsa wala pa makasuway og kamang sa iyang career.

Si Jandaeng sa Kokiet Boxing Stable sa Thailand, nagbitbit og 7-2-1 win-loss-draw record.

Ang batan-ong Thailander nipukan makaduha ka higayon sa iya ra usab nga kababayan nga si Dechapol Bankluaygym, kinsa gipakamang sab ni Banal sud lamang sa unang hugna.

Si Jandaeng gipahamtangan og duha ka pilde nilang Singmansak ug ni WBO Asia Pacific champion Rexon Flores sa Pilipinas.

Lain pang mopakita'g aksiyon sa 10 ka hugna nga kumbati mao ang ALA Boys nga si Rocky Fuentes ug Milan 'Milenyo' Melindo ug ang umaabot nga lightweight Glenn Masicampo sa Harada Stable.

Si Fuentes makigharong ni Greg Mangan sa ilang grudge rematch. Una nilang engkuwentro nahuman pinaagi sa controversial draw.

Si undefeated prospect Milan 'Milenyo' Melindo makigsinukliay og kumo batok sa beteranong si Fabio Marfa. Lain pang angayan lantawon mao ang engkuwentro nilang Masicampo ug ni RP No. 7 Anton Olarte sa Davao City.

Ang mga tiket mapalit na diha sa USA Sports outlets sa Ayala ug SM malls ug sa ALA Fight Club sa Banilad Town Center. Ang tiket nagkantidad og P500 (VIP/Sponsor), P300 (ringside), P200 (lower seat) ug P100 alang sa general admission.