CVIRAA giuswag

Giuswag ngadto sa Marso 4-10 ang pagpahigayon sa Central Visayas Regional Athletic Association (CVIRAA) Meet didto gihapon sa Dumaguete City, Negros Oriental.

Ang CVIRAA gikatakda untang ipahigayon sunod buwan, apan si Negros Oriental governor George Arnaiz nihangyo nga ang multi-event alang sa Basic Education Department i-uswag sa Marso.

Si Gov. Arnaiz nagkanayon nga ang Negros Oriental mo-host og national rondalla competition sunod buwan ug dili siya gusto nga maapektahan ang regional meet sa maong music festival.

Hinuon ang host division nakaandam na og mga proposed venues alang sa mga duwa ug sa billeting quarters.

Ang giplanohang duwaan ubos ni Dr. Licerio Napao, naglangkob sa Dumaguete Science High School alang sa Bais, Valencia National High School alang sa Bayawan, Hunob Elementary School alang sa Bohol ug Dumaguete National High School alang sa Cebu Province.

Ang Cebu City adto sa Bacong Central School, ang Danao adto sa Batinguel ES, Dumaguete sa West City ES, Mandaue sa Magsaysay ES, host OrNeg adto sa Negros Oriental High School, ang Siquior sa Amandor Dagudag ES, Tagbilaran sa Camanjac ES, Talisay sa North City ES, Tanjay sa West City ES ug ang Toledo adto sa Calindagan Elementary School.

Ang tanang division heads/representatives gipaabot nga mo-uban ni DepEd-VII PESS chief Dr. Vivian Ginete ug Dr. Danilo Villadolid ning buwana alang sa inspeksyon sa mga binyu.

Ang dancesport ug Miss CVIRAA malakip lang gihapon sa mga indigay sa maong torneyo.