300 runners magginukdanay sa Cebu City ASEAN 10-K Fun Run

Niabot ngadto sa 300 ka runners ang nipadayag sa ilang partisipasyon sa Cebu City ASEAN 10-kilometer Fun Run nga mosikad karong Domingo diha sa atubangan sa Cebu Provincial Capitol building.

Bisan pa niini, gipaabot nga mosaka pa ang mga entries sanglit padayon pa man ang pagpangrehistro diha sa Cebu City Sports Commission nga nahimutang sa Cebu City Sports Center.

Ang registration fee nagkantidad og P120.

Ang staff sa sports commission nagkanayon nga ang pagpanglista sa mga entries kasamtangang ihiklin una sa Biyernes sa pag-obserbar sa ASEAN Summit-related holiday ug ilang ipadayon ang pagpanglista sa Sabado nga mao sab ang adlaw sa panghatag sa mga race numbers ug final briefing.

Si Cebu City Councilor Sylvan 'Jack' Jakosalem nagkanayon nga ang kalihukan sa Domingo gituyo paghulma aron paglingaw sa mga delegado sa ASEAN Summit.

Laing kategoriya ang gigahin alang sa Summit, ang open category (men and women), Masters A category (40-59 years old), Masters B category (60 yrs. old and above) ug ang Executives.

Ang mananaog sa open divisions sa men ug women makabulsa og P10,000 cash ug trophy samtang ang second placers makadawat og P8,000 ug trophy. Ang third placers makadawat og P6,000 ug trophy.

Dili sab magminghoy ang 4th hangtod sa 30th placers tungod kay makadawat sab sila og ganting salapi ug medalya.

Makampiyon sa Masters divisions, sa A ug B categories makadawat og P5,000 ug trophies, ang second placers makadawat og P4,000 ug trophies ug ang third placers makadawat sab og P3,000 ug trophies.

Ang fourth hangtod sa 20th placers makadawat og ganting salapi ug tropeyo.

Alang sa dugang kasayoran mahimong mobisita sa CCSC office o tawag sa tel. no. 255-6985.