Naglutaw pa sa hain title fight ni Bautista

Wala pa mahingpit ug naglutaw pa sa hangin ang WBO super bantamweight title fight tali nilang defending champion Daniel Ponce de Leon ug No. 1 challenger Rey 'Boom Boom' Bautista, nga usa sa undercards sa makasaysayanon nga "World Cup of Boxing" Philippines vs. Mexico card karong Marso 4 dinhi sa dakbayan sa Sugbo.

Niadtong bisperas sa Bag-ong Tuig, si international promoter Sammy Gello-ani mipahibalo atol sa usa ka press conference didto sa Laguna Garden Cafe nga si Bautista mohagit ni de Leon sa maong multi-million promotion diin si Z 'The Dream' Gorres makigsangka sab batok ni Fernando Montiel alang sa WBO super flyweight crown.

Apan si Joe Hernandez, ang trainer ug adviser ni de Leon, mipadayag sa MaxBoxing.com nga si Golden Boy Promotions vice president Eric Gomez nitawag kaniya sa miaging semana ug nitanyag nga si de Leon paawayon batok ni Israel Vazquez sa undercard sa away ni Shane Mosley karong Pebrero 10 didto sa Mandalay Bay sa Las Vegas.

Midugang si Hernandez nga si Gomez wala maghisgot sa pangalan ni Bautista nga maoy sunod makontra ni de Leon.

Sa iyang bahin, si de Leon nagkanayon nga andam siyang makigbinukbukay ni Bautista kun makiangayon ang presyo apan gusto siya nga ang ilang away adto sa Amerika.

Sa dihang gipangayoan sa iyang komentaryo kun final na ba o dili ang away nilang Bautista ug de Leon, si Gello-ani mitubag nga "As far as I know, the Bautista-De Leon fight is already in the works. I don't know if it's not yet final. We'll just wait for the official announcement from Golden Boy officials because they're the ones making the negotiations."