Skyblazers nakaging sa Warriors

Ang University of San Carlos (USC) Warriors mipakaging sa Salazar Colleges of Science and Institute Technology (SCSIT) Skyblazers, 90-81 alang sa ikaupat niining sunod-sunod nga kadaogan sa nagkainit nga aksiyon sa Visayas Amateur Athletic Association (VAAA) men's basketball tournament sa miaging gabii diha sa Inayawan Sports Complex.

Sa ikaduhang sunod-sunod nga higayon, si Niño Ramirez maoy nahimong bayani sa USC human kini miratsada og 24 puntos nga nakatabang og daku sa Warriors pagsakmit sa liderato bitbit ang 4-0 win-loss record.

Ang sinaligan nilang Enrico LLanto nalimitahan ngadto lamang sa singko puntos, apan ang eksplosibong duwa ni Ramirez inabagan nilang Vincent Padayao, Vernini Tangarorang ug Kevin Jake Arriesgado maoy nisalbar sa Warriors.

Sikit kaayo ang duwa sa sinugdanan nga miresulta ngadto sa panagtabla, 23-23, human sa unang kuwarter, apan ang Warriors kalit lang nga nanginit hinungdan nga nakaposte kini og siyete puntos nga labaw human sa first half, 53-46.

Maayong labok ang giwadwad sa SCSIT Skyblazers sa katapusang duha ka kuwarter, apan ang Warriors wala magpa-alkansi gumikan kay nagpabilin ang maanindot niining opensa hangtud sa naghinapos nga bahin sa duwa.

Sa laing bahin, ang mosunod nga aksiyon sa VAAA adto duwaon sa dakbayan sa Tagbilaran.

Karong Enero 13, ang Holy Name University (HNU) mo-host sa Foundation University (FU) sa Dumaguete City. Sa sunod nga adlaw, mag-unay ang pulos Bol-anon nga koponan gumikan kay ang HNU makighamag sa Bohol Institute of Technology (BIT) Cruisers.