Labing unang binakbakay sa Borbon unya Enero 6

Ang SGG Sports Promotions ni international promoter Sammy 'Don King' Gello-ani mopahigayon sa labing una niining promosyon ning tuiga karong Enero 6 didto sa Borbon Sports Complex sa lungsod sa Borbon, amihanang bahin sa Sugbo.

Si Aljun Salogaol, lumad nga taga-Borbon, naglaraw nga molingaw sa iyang mga tagilungsod sa iyang kahanas sa iyang pamuksing gumikan kay siya man maoy mowadwad sa main event batok sa beteranong si Jerry Manganip.

Gipaluyohan sa Local Government Unit (LGU) sa Borbon ubos sa liderato nilang Mayor Neal Vergara ug Vice Mayor Butch Sepulveda inabagan sa Association of Barangay Captains of Borbon, ang maong eksplosibong promosyon kabahin sa mga kalihukan sa usa ka semanang selebrasyon sa kapistahan sa Borbon.

Mopakita sab sa iyang abilidad sa maong 34 ka hugna nga binukbukay mao ang wala pay pidleng si Wilson 'Weng' Haya, kanhi National Youth champion, nga makigsangka batok ni Rico Genon, ingon man silang Marjo Borres vs. Nelson Llanos, Ricky Sismundo vs. Danny Logramonte ug si Mark John Yap, kinsa mopakita sa iyang abilidad sa labing unang higayon isip pro batok ni Julius Cabusas.