Torneyo sa kalungsoran ug kabarangayan

Usa ka magbabasa nga nagpaila sa iyang kaugalingon nga usa ka yanong lungsoranon mipadangat sa iyang reaksiyon kalabot sa akong gisulat sa akong lindog Magbilyar Ta, gula sa Banat News niadtong Disyembre 5, 2006.

Ang iyang text nagkanayon: "Sir, good day. Usa ko sa tigbasa kanunay sa imong lindog nga Magbilyar Ta. Nakadayeg ko sa imong opinyon sa natad sa sports dinhi sa Pilipinas. Sa akong pagbasa sa imong column niadtong December 5, 2006 issue sa Banat News, nakaingon ko nga eksakto ka sa imong mga punto. Angay magpasiugda og torneyo sa kalungsoran ug kabarangayan aron madasig ang mga batan-on. Ako si Junior Clerigo, yanong lungsoranon." -- 0918-5971444

* * *

Daghang salamat sa imong text agi'g tampo dinhi sa akong lindog. Mao gayod unta kini ang angay buhaton aron mapalambo gayod pag-ayo ang billiard sport dinhi sa atong nasud. Gikinahanglan ang pagpahigayon og torneyo sa kalungsoran ug kabarangayan aron pagkaplag og dugang mga talento.

Bilib bitaw kaayo ko sa mga mayor sa kalungsoran ug kapitan sa kabarangayan nga magpasiugda og billiard tournament. Ubay-ubay na ang mga mayor ug mga kapitan nga naghimo niini sa tagsa-tagsa nila ka dapit. Angay usab sun-on sa uban ang gihimo niining maong mga mayor ug kapitan aron madasig pag-ayo ang atong mga batan-on sa pagsagop sa sports imbes nga magpakabuang sa ginadiling drugas ug uban pang makadaot nga bisyo. Nindot unta kaayo kun magkadaghan ang mga billiard tournament nga ipahigayon sa kalungsoran sa kabarangayan.

* * *

Pahalipayan diay nako ang mga sakop sa bag-ong natukod nga kahugpongan nga gitawag og Kaanib sa Mithi, Diwa ug Dagang ni Garcia (KAMIDAGAR) didto sa lalawigan sa Bohol. Nanumpa ang mga sakop sa maong pundok niadtong Nobiyembre 4, 2006 diin maoy inducting officer ang apo ni kanhi Presidente Carlos F. Garcia nga si Jose Carlos Garcia Campos. Kining tagsulat usa sa mga direktor sa maong kapunongan. Nangusog usab aron matukod ang KAMIDAGAR si Nemesio 'Nemi' Monton, ang presidente sa Amateur Boxing Association of the Philippines (ABAP)-Bohol chapter.

* * *

(Mga sugyot ug pakisayod? Text sa 0910-81-5522)