Giyano lang sa Lapu-Lapu ang ilang duha ka mga kumbati, aron pagposte og 4-0 sa qualifying round.
Kagahapon ang Lapu-Lapu mihatag og leksiyon sa Compostela human nila patilawa og pilde sulod sa duha ka sets, 25-22, 25-14. Nidaog sab ang Lapu-Lapu batok sa Boljoon niadtong miaging adlaw.
Ang katapusang ikasangka sa Lapu-Lapu karong adlawa sa qualifying round mao ang Talisay City. Apan ang resulta dili makaapekto sa standing sa Lapu-Lapu gumikan kay nakaangkon na kini daan og luna sa semis.
Ang Talisay kasamtangang nagsunod sa Lapu-Lapu bitbit 3-0 nga baraha, ikatulo ang Compostela bitbit ang 2-2 win-loss record, samtang ang ang Balamban nagtangag og 1-2 nga rekord ug ang Boljoon ug Sta. Fe parehong wala makatilaw og daog.
Sa pool B, ang Mandaue City ug Catmon pulos nagtangag og limpyong rekord 3-0 matag-usa.
Ang Mandaue mipukan sa Toledo City, 25-18, 25-21 ug Badian, 25-9,25-9, ang Catmon mibuntog sa Minglanilla sud sa tulo nga sets, 25-27, 25-22, 25-19.
Ang Toledo City nagbitbit og 2-1 win-loss record, ang Minglanilla nagtangag og 1-2 ug ang Badian ug Medellin pabiling walay daog sud sa tulo ka duwa.