M.Lhuillier abante na sa MVBA finals

Nakamugna og usa ka dakung milagro ang M. Lhuillier Kwarta Padala-Cebu City kortesiya ni Stephen Padilla, kinsa milansang sa iyang 3-point shot sa nahabiling 10.5 sa duwa aron pagtuboy sa Jewelers ngadto sa kulbahinam nga kadaugan batok sa Cebu Landmaster-Mantawi, 90-89 sa miaging gabii diha sa Cebu Coliseum.

Gawas nga nadepensaan ang ilang korona isip Visayas Division champion, ang M. Lhuillier nakaangkon sab og katungod nga hagiton ang Pryce Pharma MisOr sa best-of-three MVBA Second Conference finals.

Kini human gilangkat sa MisOr ang kampiyonato sa Mindanao Division pinaagi sa pagtumba sa MP Warriors-GenSan sud sa overtime, 77-74.

Human sa nasud nga 3-pointer ni Padilla nga nakapalayat sa tibuok kampo sa M. Lhuillier, aduna pa untay purohan ang Cebu Landmaster nga modaog apan wala masulod ang medium range jump shot ni Egay Billones dayong kapupos sa oras.

Makapabuak sa dughan ang maong kapildihan sa Landmaster ni Joe Soberano ug coach Jun Tan gumikan kay sila man maoy mikontrolar sa duwa human sila nakalabaw, 66-60, sa nahabiling 10 minutos sa duwa.

Gani sa nahabilin nga 1:27 sa ilang kumbati, nanimaho na og daog ang Landmaster gumikan kay na technical si M. Lhuillier coach Raul 'Yayoy' Alcoseba ug niadtong tungora labaw sila og kuwatro puntos, 84-80.

Si Alex Cainglet yanong mipasud sa duha niya ka free throws aron pag-inat sa labaw sa Landmaster ngadto sa 86-80.

Apan wala damha nga didto sab diay magsugod ang dakung katalagman nga mihampak sa Landmaster.

Si Billones nakahimo og turnover gikan sa inbounds ug si Carlos Sayon nakamugna sab og duha ka crucial turnover sa daginutong oras sa duwa.

Gipahimuslan og maayo sa Jewelers ang maong kahigayonan hinungdan nga nakasikit sila sa iskor nga 87-88 human sa follow up shot ni Jayford Rodriguez sa nahabilin nga 46 segundos.

Sa sunod nga play, gi-foul ni Padilla si Bernie Ursal apan usa lamang ka free throw ang napasud niini aron paghatag sa Landmaster og 87-89 nga labaw.

Mao na lang ang kakugang sa Landmaster human sila gibuynamanohan sa three-point shot ni Padilla.

Angayan sab daygon sa maong kadaogan mao si Woodrow Enriquez, nga nanglimbasog og maayo sa dihang gikinahanglan siya sa M. Lhuillier. Si Enriquez mitapos og 25 puntos, samtang si Padilla midugang og 19 aron pag-angkon sa pasidungog isip MVBA Visayas Division MVP.

Si Alex Cainglet maoy nangulo sa Landmaster bitbit ang 29 puntos, samtang si Billones mi-amot og 18 puntos.