Siso 'grandslam' na

Talagsaong pinaskohan ang naangkon ni Sally Mae Siso human niya malangkat ang talagsaong "grandslam" title sa girls' 12-under division sa Perlis Milo International Junior Age-Group Tennis Championships 2006 kagahapon didto sa Matrikulasi Arau Perlis, Malaysia.

Dobleng selebrasyon ang naangkon ni Siso gumikan kay gawas nga nidaog kini sa singles' event, nakampiyon sab kini doubles event uban sa iyang Malaysian partner nga si Neesh Menon.

Ang 4th-ranked nga si Siso sa University of San Carlos-South Grade School nihipos sa iyang ikatulong titulo sa singles event dihang gipakamang si Korean Choi Jihee sa sunod-sunod nga sets sa iskor nga 6-4, 6-4.

Ang hiniusang puwersa nilang Siso ug Menon nipakaging batok nilang Koreans Choi Jihee ug Lee Daun aron paglangkat sa korona sa double event.

Silang Siso ug Menon nidaog sa korona pinaagi sab sa sunod sunod nga sets, 6-4, 6-4.

Ang maong kadaugan magsilbeng panimalos nilang Siso ug Menon, nga gibuntog nilang Choi Jihee ug Lee Daun atol sa Penang International Junior Tennis Championships niadtong miaging semana.