White misakmit sa titulo

Nakalahutay ang White team sa mainitong rally sa Red team sa katapusang kuwarter aron pagkulit og 59-53 nga kadaugan dayon na ngadto pagsakmit sa kampiyonato sa Alliance Men Philippines Cebu Zone fellowship basketball tournament niadtong Dominggo.

Ang White nga gilangkuban og mga magduduwa gikan sa Mandaue City Alliance Church ni Pastor Danny Maing, Camputhaw Alliance Church ni Pastor Martirez Masaglang ug Christian Community Fellowship ni Pastor Roy Noel, nakabentaha na daan sa pagsugod pa lang sa duwa ug niposte og 14 puntos nga labaw, 28-14, sa sayong bahin sa ikaduhang kuwarter.

Sa pagsugod sa katapusang 10 minutos sa duwa, ang Red nga gisakupan sa alliance churches gikan sa Liloan (Pastor Arvel Summinggit), Talisay (Pastor Jerry Dubrico) ug Maribago (Pastor Luke Luza), nipabuto og 16-9 nga rally nga nakapakulba sa kampo sa White.

Apan nagpakalig-on ang White sa naghinapos nga bahin aron langkaton ang kadaugan.

Ang maong kadaugan gipangulohan ni Garry Castanas pinaagi sa iyang 20 puntos, si Manuel Vargas niamot og 16 puntos, samtang si Ruel Tormis nitampo og 11 puntos.

Sa laing duwa, ang Blue ningmakmak sa Green aron pag-angkon sa ikatulong puwesto.