Atan Guardo milangkat sa Western division title

Ang Atan Guardo mipalayas sa Villa Shipping Lines pinaagi sa 101-93 nga kadaugan aron paglangkat sa Western Division title sa 7th Cebu Eastern College-Guardo Friendship Cup basketball tournament diha sa Cebu Eastern College (CEC) gym.

Si kanhi commercial star Paul Abais ug power-center Dindo Sausa mipahungaw sa ilang kainit sa sayong bahin sa duwa aron paghatag sa Atan Guardo og kuwatro puntos nga labaw, 23-19 sa first quarter ug misaka pa kini ngadto na sa 19 puntos, 55-36 pagtapos sa first half.

Apan ang Villa Shipping nga gipangulohan ni playing coach Pablo Yu, maisugon kaayong nakigbatok ug milusad kini og makalilisang nga fastbreak attack sa kombinasyon nilang Teyoy Lim, Edvin Kaw ug Joel Chan aron pagkitkit sa labaw ngadto na lang sa kuwatro puntos, 63-67 pagsulod sa final period.

Hinuon, ang playmaker nga si John Andrew Auza ug Bonito Zanoria miluwas sa Atan Guardo gikan sa pilegrosong sitwasyon pinaagi sa ilang crucial baskets sa himalatyong segundos sa duwa aron pagselyado sa ilang kadaugan.

Si Abais maoy topscorer sa Atan Guardo nga nilansang og 28 puntos, gisundan ni Sausa sa iyang 21 puntos.

Sila si Auza ug Zanoria mibugha og 15 puntos matag usa.

Ang Villa Shipping gipangulohan ni Kaw sa iyang 18 puntos, samtang sila si Yu, Lim, Chan ug Dave Lim nagkumboya og 57 puntos sa maong kapildihan.