Mangayo og mga hulagway

Niining bahina sa akong lindog, tugoti ng akong hatagan og luna kining text gikan sa usa ka suking magbabasa niining lindog nga Magbilyar Ta. Nakahukom kong ipatik ang iyang text aron paghatag kaniya'g gamay nga konsuylo.

Ania ang iyang text: "Good day, Sir. Usa ko sa nagbasa kanunay sa imong column nga Magbilyar Ta. Mangayo unta ko nimo og favor. Mangayo ko og picture nila ni Efren 'Bata' Reyes, Francisco 'Django' Bustamante, Alex Pagulayan ug uban pang sikat nga bilyarista. Kanang nagduwa sila og billiard. Ako man unta kining i-frame ug i-display ang ilag picture sa akong billiard establishment diri sa Ormoc City." -- 0919-4694724

* * *

Daghang salamat sa imong text. Usa kini sa daghang feedback nga akong nadawat nga nagmatuod nga kusog kaayo ang lindog nga Magbilyar Ta diha sa Ormoc City. Salamat sa kanunay ninyong pagsunod niining bugtong column nga eksklusibong maghisgot bahin sa billiard sport.

Bahin sa imong gihangyo, ingon sa lisod alang nako ang pag-provide kanimo sa mga hulagway sa mga iladong bilyarista sama nila ni Reyes, Bustamante, Pagulayan ug uban pa tungod sa usa o duha ka katarongan. Pero dili man dakung problema kanang imong tinguha. Naay daghang hulagway nila ni Reyes, Bustamante ug Pagulayan nga atong makita diha sa internert.

Mahimo man nga imong ibalhin ngadto sa hard copy ang maong mga hulagway kun gusto nimo. Kun dili ka maantigo sa pagpahigayon niini, mahimo man nga mamalihog ka sa mga tagdumala o tig-alagad sa internet cafe. Kini lang ang nahunahunaan kong solusyon sa imong katuyoan.

* * *

Sa laing bahin: "Kaniadto ra kong nagsunod sa imong column Magbilyar Ta kay nakatabang kaayo ni sa akong pagdula. Daily man ning imong column sa una. Nganong karon di man lagi? Daghan baya ming nagsunod ini. Laay paabuton ang sunod nga issue kay di na man kanunay." -- 0921-4552188

Salamat sa imong pagsunod kanunay ning lindog. Ang hinungdan nga dili na makagula kada adlaw ang Magbilyar Ta mao ang kakulang sa espasyo. Hinaut unta nga inyong masabtan kining maong inconvenience.

Ako nag-agad lang sa hukom sa akong editor. Manghinaut lang pud ko nga makasabot mo sa sitwasyon. Apiki gyud kaayo sa espasyo ang Banat News. Aduna man guy mga mahinungdanong anunsiyo nga kinahanglan gyud ipatik segun sa gitakda nga petsa.

* * *

(Mga sugyot ug pakisayod? Text sa 0910-8105522)