Warriors gilumsan sa Aquastars

Wala makompleto ang selebrasyon sa MP Warriors-GenSan sa kadaugan sa ilang team owner ug idolo nga si Manny Pacquiao human sila gilumsan sa Talisay City Aquastars, 73-83, sa miaging gabii sa nagkainit nga aksiyon sa ML Kwarta Padala Mindanao Visayas Basketball Association (MVBA) Second Conference didto sa Talisay City Sports Complex.

Inspirado kaayo ang Warriors ni coach Ramon Pido gumikan kay sila maoy mikontrolar sa duwa sud sa tulo ka kuwarter.

Apan diriyot ra ang ilang himaya gumikan kay sila si Bruce Dacia, Mark Ababon ug Leo Bat-og mipasiugda og mainit kaayong rally sa katapusang kuwarter aron pagtuboy sa Aquastars ngadto sa kadaugan.

Si Dacia maoy nangulo sa MLSDF-backed Aquastars ni Mayor Socrates Fernandez ug coach Eddie Ybañez bitbit ang 20 puntos.

Si Ababon mitampo og 12 puntos alang sa Aquastars nga mikulit sa ikaupat nilang sunod-sunod nga daog aron pag-inat sa ilang baraha ngadto sa 6-3.

Ang Warriors nakatilaw sa ikaupat niining pilde nga gi-atbangan og upat sab ka daog.

Mga iskor

Talisay (83) - Dacia 20, Ababon 12, Carretas 11, Bat-og 11, Berame 7, Lumantas 7, Laygo 7, Akad 6, Garcia 2

MP Warriors-GenSan (73) - Locsin 19, Recustodio 15, Coronado 14, Medalla 9, Tadena 7, Menor 4, Farochilen 3, Sumampong 2