Cebu Landmasters mipukan sa MP Warriors

Ang Cebu Landmaster-Mantawi padayong miratsada human gipakaging niini ang MP Warriors-GenSan, 71-63, niadtong Sabado sa gabii sa ML Kwarta Padala Mindanao Visayas Basketball Association (MVBA) Second Conference diha sa Mandaue City Cultural and Sports Complex.

Human magtabla sa iskor nga 12-12 sa naghinapos nga bahin sa unang kuwarter, ang Landmasters mi-rally pinaagi sa gipakitang kainit nilang Bernie Ursal ug Abe Galinato aron pagposte og 15 puntos nga bintaha human sa first half, 43-28.

Ang mga batos nilang Joe Soberano ug coach Jun Tan mi-inat sa ilang labaw ngadto sa 17 puntos sa iskor nga 55-38.

Ang Warriors igo lamang nakasikit sa iskor nga 63-70 sa nahabilin nga 1:33 sa duwa. Sukad niadto, gipahugtan sa Landmasters ang ilang depensa hinungdan nga wala na maka-iskor pa ang GenSan hangtud nga nahurot ang oras sa ilang duwa.

Si Galinato mitali og 14 puntos, samtang sila si Ursal ug Carlos Sayon mitali og 13 puntos matag usa alang sa Landmasters nga nagbitbit na karon og 5-2 win-loss record. Ang GenSan nadakin-as ngadto sa 4-3.