Aquastars, Landmasters nidaog

Ang mga koponan sa Visayas Division mipakaging sa tagsa-tagsa nila ka mga kaatbang gikan sa Mindanao sa nagpadayong aksiyon sa ML Kwarta Padala Mindanao Visayas Basketball Association (MVBA) Second Conference niadtong Miyerkules sa gabii didto sa Talisay City Sports Complex.

Sa main game, ang Talisay Aquastars ni Mayor Socrates Fernandez ug coach Eddie Ybañez nakalingkawas gikan sa mga kamot sa Iligan Archangels ni Mayor Lawrence Cruz ug coach Ed Arugay, 80-76, samtang ang Cebu Landmaster-Mantawi ni Joe Soberano and coach Jun Tan milampurnas sa Lanao Royals ni Governor Imelda Dimaporo ug coach Angelito Quidlat, 83-64.

Nahimong bayani sa Aquastars mao si James Laygo, kinsa mipabuto og lima ka 3-pointers aron pagtapos og 26 puntos. Si Chris Carretas midugang og 17 puntos, samtang si Jessie Lumantas miamot og 16 puntos alang sa Aquastars, nga nagbitbit na karon og 4-3 win-loss record.

Ang Aquastars mikolapso human nakalabaw og 15 puntos sa ikaduhang kuwarter, 38-23, hinungdan nga nakagukod ang Archangels, 72-74, sa nahabiling 1:18 sa duwa.

Katapusang nakasikit ang Archangels sa iskor nga 74-77 gumikan kay ang 6'7" nga sentro nga si Rino Berame mipasud sa iyang pick-and-roll aron pagselyado sa kadaugan sa Aquastars, 79-74, sa nahabiling 22 segundos.

Sa pasiunang duwa, sila si Alex Cainglet ug Egay Billones nagkumboya og 31 puntos alang sa ikaupat nga kadaugan sa Landmasters. Ang Landmasters mirehistro karon og 4-6 win-loss record. Mga iskor