Hapee-PCU solo lider

Inangkin ng Hapee-PCU ang pansamantalang solong pamumuno matapos ilista ang 93-66 panalo laban sa baguhang Kettle Korn-UST sa pagpapatuloy ng PBL Silver Cup sa UST gym kahapon.

Dinomina ng Teethmasters ang Kettle Korn sa paglista ng pinakamalaking kalamangan ng 32-puntos, 89-57 tungo sa kanilang ikalawang sunod na panalo habang nalasap naman ng Tigers ang kanilang ikalawang sunod na kabiguan.

Sa unang laro, binalikan ng Harbour Centre ang kanilang porma upang makabawi sa pagkatalo sa kanilang opening game matapos ang 76-61 panalo laban sa baguhang Mail & More Comets.

Bumandera sina Al Vergara at Chico Lanete para sa Port Masters sa pagkamada ng tig-14 puntos upang burahin sa kanilang alaala ang 68-73 pagkatalo sa Hapee-PCU noong Sabado sa San Juan Arena.

"I think maganda na ngayon ang inilaro ng buong team, especially ‘yung mga bagong players," wika ni coach George Gallent ng Port Masters. "Medyo nakakapag-adjust na sila sa isa’t isa."

Naitala ng Harbour Centre ang pinakamalaking kalamangan na 69-56 sa huling 2:24 ng final canto mula sa isang 3-point shot ni Vergara na di na natibag ng Comets na nadiskaril sa kanilang debut game.