Aquastars batok Royals

Ang Talisay City Aquastars mo-host sa Lanao Royals karong adlawa pagsugod sa inter-division phase sa ML Kwarta Padala Mindanao Visayas Basketball Association (MVBA) Second Conference diha sa Talisay City Sports Complex.

Ang Talisay Aquastars ni head coach ug MLSDF executive director Eddie Ybañez makigtakos sa Lanao Royals ni Gobernadora Imelda Q. Dimaporo ug coach Angelito Quidlat sa main game nga gikatakda sa alas 8:00 sa gabii.

Sa pasiunang duwa sa alas 6:00 sa gabii, ang Toyota-Iloilo Turbos ni Robert Uy ug coach Jerry Jaranilla makighamag batok sa Iligan Archangels ni mayor Lawrence L. Cruz ug coach Ed Arugay.

Ang Aquastars magsandig na sab sa alas niining si Bruce Dacia (11.3ppg) ug ingon man nilang Kim Calo (8.4ppg) ug Rino Berame (7.2ppg).

Ilang sukdon ang abilidad sa managsuong Arlo Jueves (11.3ppg) ug Baltazar Jueves (10.2ppg) ug Robert Valconcha (10.2ppg).

Ang Aquastars nagbitbit og 2-3 win-loss record, samtang ang Royals kausa pa lang makadaog sa unom ka duwa.

Sa laing bahin, gubat sa MVBA scoring leaders maoy masaksihan gumikan kay silang Dino Cabili (19.2ppg), Marvin Tundag (14.0ppg), Jeffrey France (13.2ppg) ug Francis Sanz (11.0ppg) sa Archangels makig-engkuwentro nilang Ruel Balgos (22.0ppg), Elben Leonida (12.3ppg) ug Eldrin Senierez (11.7ppg) sa Turbos.

Ang Archangels nagbitbit og baraha nga 2-4, samtang ang Turbos wala pay daog sa tulo ka duwa.