Turbos pilde sa Kwarta

Gipalapdan og maayo sa M. Lhuillier Kwarta Padala-Cebu Jewelers ang ilang liderato sa Visayas Division sa ML Kwarta Padala Mindanao Visayas Basketball Association (MVBA) Second Conference human gilabhan ang nagkagidlay nga Toyota-Iloilo Turbos, 92-84 sa miaging gabii diha sa Lapu-Lapu City Gym.

Gawas lamang sa unang kuwarter diin sila alkansi og tres puntos, 23-26, dominado kaayo sa Jewelers ni Michel Lhuillier ug head coach Raul 'Yayoy' Alcoseba ang duwa dayon na ngadto sa pagkulit sa ikaupat nilang daog sa lima ka duwa.

Lima ka batos sa M. Lhuillier ang mi-iskor og kapin sa 10 puntos nga gipangulohan nilang Niño Ramirez ug Alano Caputolan nga mipabuto og 15 puntos matag usa. Sila si Michael Manigo, Jayford Rodriguez ug Danny Aying miamot og 13 puntos matag usa.

Sa gihapon, misalida og maayo sa pilderong Turbos mao si Ruel Balgos, kinsa miratsada og 27 puntos. Si Eldrin Senierez mipakita sa labing maayo niyang duwa aron pagtapos og conference-high 22 puntos, apan wala kaayo sila makaangkon og igong suporta sa uban nilang teammates.

Karong alas 6:30 sa gabii, ang Talisay City Aquastars ni coach ug MLSDF executive director Eddie Ybañez mo-host sa Cebu Landmaster-Mantawi ni Joe Soberano ug coach Jun Tan didto sa Talisay City Sports Complex.

Mahinungdanon kaayo ang maong duwa gumikan kay ang modaog mao man ang makaangkon sa No. 2 spot sa Visayas Division sa pagsugod sa inter-division phase diin ilang sangkaon ang mga koponan gikan sa Mindanao.

Sa pagka karon, nagtabla ang Talisay ug Mantawi sa managsamang baraha nga 2-2. Ang Talisay midaog sa Mantawi, 74-65 sa una nilang engkuwentro niadtong Oktubre 26 diha sa Mandaue City Cultural and Sports Complex.