Dula ug sugal

Usa ka magbabasa niining lindog mi-text nga nagkanayon: "Nagkadaghan ang makamao nga modula og bilyar diri sa Liloan. Nagkadaghan pod ang makamao mosugal. Dagku kaayo og pusta hangtod magbuntagay." -- 0921-4676329

Kining lindog dili mo-encourage sa mga magbabasa sa pagpaulipon sa sugal tungod kay dili kini magdulot og kabulahanan. Pero dili gayod kalikayan nga usahay ang dulang billiard maoy himuong medium sa sugal sa pipila nato ka kaigsuonan. Ang ato lang ikasugyot mao nga i-regulate kini. Ang mga tagdumala og bilyaran daku kaayo'g ikatabang aron dili modagsang pag-ayo ang sugal.

Usa sa gikinahanglan aron mawagtang kining pustaanay sa sugal ginamit ang dulang bilyar mao ang pagpasiugda og mga torneyo. Nagkinahanglan kita'g mga sponsor nga mopaluyo niining maong lakang. Pinaagi niini, makaamgo ang mga mahiligon sa billiard sport nga ang pagdula og bilyar mahimo diay nga usa ka career. Niini, dili na kinahanglang mokuot pa sila sa kaugalingon nilang bulsa aron makadula.

Hinuon, mosugot man kita'g sa dili, daghan kaayong mga sugarol karon nga ang dulang bilyar maoy paagi nga gibasihan sa ilang pustaanay. Makita kini nato bisan sa mga bilyaran sa dakbayan sa Sugbo. Ang ato lang ikatambag nga dili kini pasobrahan. Kun mahimo na ganing usa ka bisyo ang pagpanugal, dili na kini magdulot og kaayohan ngadto sa mga hingtungdan.

Maoy atong gi-encourage ang pagdula og billiard isip usa ka career. Kana bang makasunod kita sa mga tunob nila ni Efren 'Bata' Reyes, Francisco 'Django' Bustamante, Lee Van Corteza, Antonio 'Gaga' Gabica, Warren Kiamco ug daghan pang uban. Dili bisyo ang ilang pagdula og bilyar. Gihimo nila kining gabayan sa ilang panginabuhi ug nabulahan sila niini.

* * *

Mo-greet ko sa tag-iya sa cellphone number 0910-2660647 nga nagpaila nga usa ka residente sa Liloan, Cebu. Wala siya magpaila sa iyang ngalan apan mitug-an siya sa iyang text nga kanunay siyang nagsunod niining atong lindog nga Magbilyar Ta. Kanunay sab siyang nagsunod sa mga panghitabo sa billiard sport.

Daghang salamat, higala. Hinaot unta nga imong padayonon ang pagsuporta niining ubos kong lindog ug sa katibuk-ang Banat News. Hinaot unta nga modaghan ang imong kaliwat. Sa katapusan, malipayong pagbasa sa Banat News kanimo ug sa tanang sakop sa imong banay.

* * *

(Mga sugyot ug pakisayod? Text sa 0910-8105522)