Cacoy Cañete gipasidunggan

Gipasidunggan ug gituboy na sab sa Hall of Fame si eskrima grandmaster Ciriaco 'Cacoy' Cañete sa gipahigayong 6th annual Martial Arts History Museum niadtong Oktubre 14, 2006 didto sa Sta. Clarita, Los Angeles, California.

Mao kini ang ikawalong Hall of Fame award nga nadawat ni Cañete sa iyang career isip martial arts expert sa arnis o stick-fighting sa nagkadaiyang dapit sa kalibotan.

Pito sa Hall of Fame awards gihatag kaniya sa United States, usa sa mga nasud diin nabaniog ang iyang kabantog sa natad sa martial arts, samtang ang usa dinhi sa Cebu diin nakadawat siya sa maong pasidungog niadtong 1997.

Tulo sa iyang Hall of Fame awards gikan sa Los Angeles, duha sa St. Louis, Missouri, usa sa Texas, Ohio ug Cebu.

Si Cañete nidawat trophy sa kataposan niyang nadawat nga pasidungog uban ini ang lima ka Asians nga sila si Ark Wong, Buck Sam Kong, Wally Jay, Wen May Yu ug Tosishiro Obata.

Ang Martial Arts History Museum, gituyo pag-preserve sa art, culture, music ug history sa martial arts, kinsa gipangulohan ni American-born Japanese Michael Matsuda.

Pinasidunggang dinapit sa maong kalihukan mao si senator Richard Alarcon sa California.

Lain pang awards nga nadawat ni Cañete atol sa unom ka buwan nga pagpuyo didto sa United States, diin siya mipahigayon og dili momenos 25 KA eskrima seminars ug demonstrations, mao ang World Martial Arts Masters Association ug ang Carson City (California) Certificate of Recognition niadtong Oktubre 19.