Jewelers nibuntog na sab sa Aquastars

Ang M. Lhuillier Kwarta Padala-Cebu Jewelers mipakita na usab sa ilang kaagrisibo pinaagi sa pagpukan sa Talisay City Aquastars sa iskor 74-65 aron pag-una sa liderato sa Visayas Division sa ML Kwarta Padala Mindanao Visayas Basketball Association (MVBA) Second Conference sa miaging gabii diha sa Cebu Coliseum.

Ang MVBA scoring leader nga si Woodrow Enriquez wala maka-arte tungod sa hilanat, apan si M. Lhuillier coach Raul Alcoseba mitugyan sa iyang pagsalig sa iyang mga beterano nga sila si Stephen Padilla, Michael Manigo , Marlon Piodo ug ang young star nga si Jayford Rodriguez.

Si Manigo maoy topscorer alang sa M. Lhuillier sa iyang 16 puntos ug lima ka assists, gisundan kini ni Padilla, kinsa mikimada og 15 puntos ug unom ka assists alang sa Jewelers nga miinat sa ilang baraha ngadto sa tulo ka daog ug usa ang pilde.

Samtang si Jayzer Esperat maoy nangulo sa pilderong Talisay sa iyang 14 puntos ug Bruce Dacia midugang og 13 puntos.

Ang duwa sa MVBA Visayas mobalik sa Nobiyembre 4 diin ang Toyota-Iloilo Turbos ni Robert Uy ug coach Jerry Jaranilla manulong sa Aquastars.