Alex Aroy moharong ni Juntillan

Si Alex Aroy sa Rex 'Wakee' Salud Stable makigharong batok ni Dennis Juntillano sa North Cotabato alang sa bakanteng Philippine Boxing Federation (PBF) light flyweight title nga maoy main event sa "Handog Para sa Birthday ni Mayor Damian G. Mercado" boxing promotion karong Nobiyembre 22 sa Maasin City Gym.

Gipaluyohan sa Maasin City Sports Council ubos sa liderato ni vice mayor Malonie Samaco, ang maong kalihukan gihimo agi'g selebrasyon sa adlaw'ng natawhan ni Maasin City Mayor Damian G. Mercado.

Nanghinaot ang garbo sa Maasin nga makapakita na sab og impresibong abilidad human niya palukapaha si Noel Veronque sud lamang sa unang hugna atubangan sa iyang mga tagilungsod sa katapusan niyang away niadtong Agosto 16 sa miaging tuig.

Ang "Maasin Bomber" nagbitbit og 11-3-1 win-loss-draw record uban ang 5KOs, samtang si Juntillano nagtangag og baraha nga 6-3 uban ang 2KOs.

Si Juntillano midaog pinaagi sa unanimous decision batok ni Roldan Malinao niadtong Oktubre 21 diha sa Mandaue City Cultural and Sports Complex.

Misuway siya og away alang sa RP minimumweight title ug ingon man sa PABA jr flyweight plum apan napakyas kini.

Sa undercards, si Jundee Maraon sa Cotabato Province makighamag ni Lee Escobedo sa Butuan City, samtang lain pang pambato sa Maasin nga si Jun Ferando makigtakos batok ni Allan Dugang sa Butuan City sa lain pang upat ka hugna nga binakbakay.

Sa preliminary bouts, mowadwad sab ang duha ka Maasinhon nga sila si Adonis Aguelo ug Angelito Entia batok sa mga Sugbuanon nga sila si Dondon Pangandoyon ug Reggie Campuz.