The Freeman/DyLA nidaog sa SunStar, CDN, Bantay Radyo milubong sa kontra

Si sweet-shooting pointguard Roel 'Lightning' Labrador ni-ingansa og career-high 22 puntos aron pagpangulo sa kadaugan sa hiniusang puwersa sa The Freeman/DyLA sa iskor nga 50-45 batok sa three-time champion SunStar Daily sa 2nd Newsmen Basketball Association of Cebu (NBAC) Guv Gwen Garcia Cup niadtong Domingo diha sa Talamban Sports Complex.

Human mipaulbo og 6-2 sa sayong bahin sa unang kuwarter, ang The Freeman/DyLA ubos ni NBAC president Fred Languido nagkayamokat sa ilang opensa hinungdan nga nakahigayon ang SunStar pag-ilog sa momentum dayong ilog sa labaw, 16-10.

Nadasig og balik ang The Freeman/DyLA dihang si Labrador nilunod sa iyang 3-point buzzer-beater aron pagkitkit sa labaw, 13-16 paghuman sa first quarter.

Si Labrador mipatuasik og 10 puntos atol sa 17-7 run sa ikaduhang kuwarter nga nitunol sa The Freeman/DyLA sa ilang kinadak-ang labaw nga siyete puntos, 30-23.

Lain pang niabag sa maong kadaugan mao ang power-playing center Manny 'The Tank' Villaruel kinsa nihipos og sayes sa iyang 14 puntos sa ikatulong kuwarter Niabag sab silang Edwin Ian Melecio, Eric Carlos, Paul Jun Rosaroso ug Bong Millanes alang sa The Freeman/DyLA nga nagbitbit karon og 1-1 win-loss record.

Ang pilderong SunStar gipangulohan nilang Jun Migallen ug Jade Violeta nga nipupo og 13 puntos matag usa. Si Efren Lonzon niamot og 12 puntos.

Sa laing duwa, ang Bantay Radyo milubong sa ABS-CBN Kapamilya, 74-57, samtang gilubong sab sa Cebu Daily News ang ABC/Bombo Radyo sa iskor nga 70-53.