Team Garfield nibugha sa ilang ikatulong daog

Nibugha sa ilang ikatulong daog ang team Garfield human kini maka-ipsot gikan sa mga kamot sa McMill Ferri sa iskor nga 96-94 sa second conference sa Cebu Athletic Basketball Association (CABA)-Tommy N' Tony Cup niadtong Huwebes sa gabii diha sa San Nicolas Sports Complex, ning siyudad.

Gidominar sa Garfield ang nag-unang duha ka kuwarter aron pag-angkon og nuybe puntos nga bentaha, 51-42.

Sa maong labaw, nikompiyansa ang Garfield hinungdan nga nakahigayon ang McMill og kitkit sa labaw. Gani ang McMill niaksiyon pa og ilog sa labaw apan nabaraw kini human mapukaw ang Garfield sa ilang kakulba nga mipatuman sa ilang hugot nga depensa.

Uban ang tulo ka daog sa upat ka mga duwa, ang Garfield temporaryo karong milingkod sa ikaduhang dapit uban sa Felmar Enterprises, samtang ang McMill nakatilaw na og tulo ka pilde batok sa usa ka daog.