Mantawi gilumsan sa Aquastars

Gilimitahan sa Talisay City Aquastars ang Cebu Landmaster-Mantawi ngadto lamang sa tres puntos sa katapusang singko minutos sa duwa dayon na ngadto sa pagpugnit og 74-65 nga kadaugan sa ML Kwarta Padala Mindanao Visayas Basketball Association (MVBA) Second Conference sa miaging gabii diha sa Mandaue City Cultural and Sports Complex.

Si Chris Carretas maoy nahimong bida sa Aquastars human kini miratsada og 16 puntos, lakip na niini ang duha ka free throws gikan sa foul ni Abe Galinato nga maoy nagselyado sa ilang kadaugan sa nahabilin nga 23 segundos.

Wala sab magpabitin si Bruce Dacia, kinsa mipakli og 15 puntos, upat ka rebounds ug duha ka assists. Mi-iskor siya og sayes sa 12-3 nga rally nga maoy nakabuka sa pultahan sa Talisay ngadto sa kadaugan.

Bisan og wala na uban kanila si Dale Singson nga tua na sa Alaska Aces sa PBA, ang Cebu Landmaster mipakita og maayong labok diin nilabaw pa kini og siyete puntos human sa first half, 37-30 ubos sa pagpangulo nilang JR 'Baby Shaq' Quiñahan ug Alex Cainglet.

Apan kalit nga nanginit si Carretas nga maoy miduslit sa 24-14 nga rally sa ikatulong kuwarter nga maoy nakapalabaw sa Aquastars og tres puntos, 54-51.

Sikit kaayo ang duwa nga miresulta sa panagtabla, 62-62 human nasulod ang itsa ni Carlos Sayon sa nahabiling 4:52 sa duwa.

Apan didto ra kutob ang kusog sa Cebu Landmasters gumikan kay sila si Dacia, Carretas ug Rino Berame nagtambayayong aron pag-alsa sa Aquastars ngadto sa kalampusan.

Si Kim Calo daku sab og natabang nga miamot og 12 puntos, samtang sila si Berami ug Leo Bat-og nagkumboya og 16 puntos ug 15 ka rebounds alang sa Aquastars, nga nagtabla na karon uban sa Mantawi ug M. Lhuillier Kwarta Padala-Cebu bitbit ang managsamang baraha nga 1-1 sa Visayas division.

Si Quiñahan maoy nangulo sa Cebu Landmaster bitbit ang 16 puntos, samtang sila si Cainglet ug Sayon miposte og 13 puntos matag usa.

Mga iskor:

Talisay (74) - Carretas 16, Dacia 15, Calo 12, Berami 8, Bat-og 8, Lumantas 6, Abatayo 5, Lozano 3, Garcia 1

Cebu Landmaster-Mantawi (65) - Quinahan 16, Cainglet 13, Sayon 13, Galinato 8, Solis 5, Ursal 4, Saladaga 2, Redulosa 2, Mangubat 2