2 bagong mukha ipaparada ng Alaska vs Purefoods

Pagkatapos ng triple overtime win ng defending champion Purefoods Chunkee, may idea ang Alaska kung gaano katibay ang Chunkee Giants.

Inspirado ng nakaraang 109-103 panalo laban sa Talk N Text Phone Pals na nangailangan ng tatlong extra quarters, mataas ang morale ng Chunkee Giants sa alas-7:30 ng gabing pakikipag-sagupa sa Aces na magpaparada ng dalawang bagong mukha sa kanilang laro ngayon sa Araneta Coliseum.

Kinuha ng Alaska si Dale Singson at nire-activate nila si Rensy Bajar bilang pamalit kay Bernzon Franco at inaasahang may dalang suwerte ang dalawang ito upang makaahon sa kulelat na posisyon ang Aces.

Unti-unti nang nakakabangon ang Chunkee Giants na mayroon nang 3-3 win-loss slate at base sa kanilang dalawang sunod na tagumpay-ang isa kontra sa Sta. Lucia sa San Fernando, La Union noong Sabado, 100-96, mas pinapaborang manalo ang Purefoods kaysa sa Aces na baon sa 1-4 kartada matapos ang tatlong sunod na kabiguan.

Mauuna rito ay ang sagupaan ng Red Bull at ng Welcoat Paints sa alas-4:35 ng hapon kung saan hangad ng Bulls na makisalo sa ikalawang puwesto sa walang larong Talk N Text.

Kasalukuyang kasama ng Red Bull ang pahingang Ginebra sa 3-2 kartada at ang kanilang tagumpay ay magbibigay sa kanila ng karapatang saluhan ang solo second placer na Talk N Text na may 4-2 record sa likod ng surprise leader na Sta. Lucia Realty na may pinakamagandang 3-1 karta.

Ngunit habang sinusulat ang balitang ito, naglalaban ang Gin Kings at Coca-Cola sa ikatlong provincial game ng PBA sa season na ito sa Cabagan Isabela. (MBalbuena)