Bautista 'larga NA sa estados unidos

Ang Boholanong boksidor nga si Rey 'Boom Boom' Bautista uban sa iyang trainer nga si Edito 'ALA' Villamor molarga karong gabii paingon sa Los Angeles luwan sa Philippine Airlines (PAL) alang sa iyang hugot nga pagbansay-bansay ubos ni Freddie Roach didto sa Wild Card Gym sa Hollywood, agi'g pagpangandam sa iyang umaabot nga away didto sa Estados Unidos.

Si Bautista, kinsa nabalikan na sa iyang kahimsog human nakasugat og mga injuries nga nakapaaghat kaniya pag-atras sa duha ka dagkung away dinhi sa nasud ug sa gawas, gitakda nga mosaka og balik sa ring batok sa Brazilian champion Giovanni 'The Bomber' Andrade karong Disyembre 2 didto sa St. Peter Square Times sa Tampa, Florida.

"I hope all my fans, especially my fellow Boholanos, will continue to support me and help me pray for my success. They're a big source of strength for me and I will try my best not to let them down this time," matud pang Bautista, kinsa nagkupot karon og 20-0 record uban ang 15KOs.

Misyon karon ni Bautista pagpamatuod nga wala pa matay-i ang iyang abilidad nga sayo pa gihugon-hugon nga moretiro sa ALA Stable human maangkon og injuries.

Si Bautista gitakda unta nga makigkumbati ni Andrade sa undercard sa Marco Antonio Barrera-Rock Juarez rematch sa miaging Septiyembre 16 didto sa Las Vegas, apan niatras siya sa maong away tungod sa hairline fracture sa iyang "right clavicle" atol sa training.

Niatras sab si Bautista sa ilang match batok ni Mexican Alejandro Felix Montiel ubos sa Manny Pacquiao-Oscar Larios showdown sa miaging Hulyo 2 didto sa Araneta Coliseum tungod sa virus infection hinungdan sa taas nga hilanat ug grabeng pag-ubo.

Karon nga himsog ug baskog na, ang 20 anyos nga si Bautista, gustong mopakita nga kaya niyang lampasan ang mga pagsuway nga nihampas sa iyang tim-os nga mga tinguha sa kinabuhi.