Gorres, Banal 'malampuson

Ang duha ka garbo sa ALA Stable nga sila si Z 'The Dream' Gorres ug Alex John 'Bazooka' Banal impresibo kaayong mikulata sa Indonesian nilang kaatbang nga gikahimuot og maayo sa mga nanan-aw nga nagdasok sud sa Mandaue City Cultural and Sports Complex sa miaging gabii.

Gipamatud-an ni Gorres nga andam na siya alang sa usa ka world title fight human gipaundang si Indonesian super bantamweight champion Sonny Manakane sa ikaupat nga hugna.

Wala sab magpabitin si Banal, diin iya sab nga gipakita ang iyang kaandam alang sa iyang kampanya didto sa Amerika human gipukan si IBF Pan-Pacific light flyweight titlist Angky Angkota pinaagi sa unanimous decision sud sa 10 ka hugna.

Dalaygon kaayo ang gipakitang abilidad ni Gorres nga gikalingaw og maayo sa iyang mga fans. Iyang gimakmak og maayo si Manakane gamit ang solidong mga suntok sa tiyan ug ulo sa nag-unang tulo ka hugna.

Sa ikaupat nga hugna, nagpusot-pusot ug gilumsan ni Gorres sa iyang mga suntok ang bisitang si Manakane nga maoy nakapaaghat sa trainer sa Indon paglabay sa tualya ibabaw sa ring timaan sa pagsurender.

Si reperi Tony Pesons pormal nga mi-undang sa away sa oras nga 1:11 sa ikaupat nga hugna.

Si Gorres, nga nagbitbit na karon og rekord nga 25-1-1 uban ang 14KOs, naghinamhinam na karon sa umaabot niyang paghagit ni WBO super flyweight champion Fernando 'Cochulito' Montiel.

"Andam ug excited na kaayo ko nga mo-away og world championship. Mao gyud ni ang akong gipangandaman og maayo," matud pa ni Gorres.

Kun dili madiskaril ang plano, si international promoter Sammy Gello-ani nagkanayon nga si Gorres lagmit makaaway alang sa WBO title karong Disyembre 15 sa wala pa hisayring binyu.



"That is the initial plan, but nothing is final yet because we still have to find out all the developments that may arise from the WBO convention which will start this Monday in Florida, USA," sumala pang Gello-ani.

Sa supporting main event sa "War in the Ring," ang 17-anyos nga si Banal impresibo sab kaayo bisan og wala kini makatumba sa lig-on kaayong si Angkota.

Hinuon, si Banal nakahilam-os og makabungog nga right uppercut gikan ni Angkota sa unang hugna.

Apan gikan niadto, si Banal mao na ang misalida sa tanan dayon na ngadto sa pagdaog sa scorecards sa tulo ka judges sa iskor nga 99-90, 100-89 ug 98-91. Mao kini ang nakainat sa way pildeng rekord ni Banal ngadto sa 10-0-1 uban ang 8KOs.

Sa undercards, si Mark Jason Melligen (5-0,4KOs) mibuntog ni Chris Alag pinaagi sa unanimous decision, samtang si Milan Melindo (7-0, 2KOs) mipatugpa og solidong left cross sa apapangig nga maoy nakapalukapa ni Ricardo Albia sa oras nga 1:21 sa ikatulong hugna.

Laing batos sa ALA Stable nga si Joseph Omanz ang nakakuha sab og atensiyon human niya pakamanga si Tata Galendez sud lamang sa usa ka hugna.