Mabungahon si Dale Singson sa iyang MVBA debut, apan si Carlos Sayon maoy misalida og maayo pinaagi sa pagwadwad og 21 puntos, apil na niini ang duha ka free throws sa nahabiling 4.7 segundos sa duwa aron pagselyado sa kadaugan sa Mantawi.
Grabe kaayo ang gipakitang labok sa Cebu Landmasters hinungdan nga mibulhot sab ang ilang labaw ngadto sa 22 puntos sa iskor nga 69-57, sa sayong bahin sa katapusang kuwarter.
Apan kalit lang nga misulbong ang Jewelers pinaagi nilang Jayford Rodriguez ug Woodrow Enriquez nga mipabuto og 20 sa 26-7 rally nga maoy nakakitkit sa labaw sa Mantawi ngadto na lang sa tres puntos, 73-76, sa nahabiling 1:14 sa duwa.
Katapusang nakasikit ang Jewelers sa iskor nga 76-79 human sa tulo ka sunod-sunod nga free throws ni Enriquez gumikan kay sila si Joel Solis, Bernie Ursal ug Sayon mipasud og upat sa unom ka free throws sa katapusang 11 segundos sa duwa aron pagluwas sa Mantawi.
Ang 6'7" nga si Solis midugang og 11 puntos, samtang sila si Abe Galinato, Bernie Ursal ug Alex Cainglet nakatigum og 27 puntos alang sa Cebu Landmaster ni realtor Joe Soberano.
Si Enriquez, kinsa adunay 20 puntos, maoy nangulo sa Jewelers nga moduwa batok sa MLSDF-Talisay City Aquastars ni coach Eddie Ybañez diha sa Talisay City Sports Complex.
Mga iskor
Cebu Landmasters-Mantawi (82) - Sayon 21, Solis 11, Galinato 10, Ursal 9, Cainglet 8, Singson 8, Saladaga 4, Redulosa 4, Mangubat 4, Justiniani 2
M. Lhuillier (79) - Enriquez 20, Rodriguez 16, Padilla 12, Manigo 5, Caputolan 5, Abadia 5, Ramirez 4, Llanto 3, Ocañada 2, Piodo 2, Aying 2