UC mikabkab 3 ka bulawan

Ang judokas gikan sa University of Cebu (UC) mikabkab og tulo sa lima ka bulawang medalya sa 2006 Cebu City All-Whitebelt Judo Tournament niadtong Domingo diha sa Guadalupe Sports Complex.

Nakakuha sa laing duha ka bulawan mao ang mga magduduwa gikan sa Cebu City Judo Club ug sa Doce Pares Judo Club.

Ang nidaog og bulawan sa UC mao sila si Joselito Padilla sa +85 kilograms class, Anthony Ian Canceran sa +65-85 kgs. category ug Joanna Gilig sa women's open weight category.

Usa ra ang kontra ni Padilla sa heavyweight category nga si Lloyd Limbaga sa University of San Carlos nga nitapos sa ikaduhang dapit.

Si Canceran miunay og pilde sa iyang teammate nga si Noel Bureros sa final match.

Nipahiluna sa ikatulo nga dapit mao si Elmar Valmores sa University of San Carlos (USC).

Sa pikas bahin, si Gilig maoy nag-una sa mga mananaog gikan sa UC Criminology Department. Ang silver napunta ni Michelle Legarte, samtang ang bronze medal nakubit ni Margie Estogero.

Si Chuck Cañete sa Doce Pares mao usab ang nanghawod sa +45-85 kgs division, nga giapilan sa 130 ka players.

Gipilde ni Cañete si Alex Roa sa USC sa final ginamit ang kesa gatame (scarf hold) aron pagdaog sa bulawan. Si Roa maoy nakaangkon sa silver, samtang si Geronimo Cabo sa USC maoy nakasakmit sa bronze.

Si Joaquin Fernandez sa St. Francis Assissi School, nipakita sa iyang makakurat nga performance sa -45 kgs. category aron pag-angkon sa bulawang medalya. Ang silver nakuha ni Jiegs de Gracia sa UC, samtang si Dyland Ludovice sa Divino Amore Academy sa Mohon, Talisay City maoy mitiltil sa bronze.

Ang maong kompetisyon gitukod sa Philippine Amateur Judo Association, Inc.-Cebu Chapter nga gipangulohan ni lawyer Vicente Fernandez II.

Nisuporta sab ang Cebu City Sports Commission uban sa barangay council sa Guadalupe, Cebu City.

Lain pang nagpaluyo ning maong torneyo mao ang Yoshi Mizutani, Jack n Jill Caramel Curls, Mr. Chips, Star Fruits, Jojo Gummi Strawberry Puffs ug Refresh.

Ang PAJ ug CCSC mihatag og pasidungog ngadto sa lima ka indibidwal nga nakatabang og daku pagpalambo sa judo dinhi sa Sugbo.

Ang lima nga gipasidunggan mao sila si Ciriaco 'Cacoy' Cañete, Alexander Choachuy, Sr., Eduardo Cimafranca, Sr., Nestor Ducante ug Perfecto de los Reyes Jr.