AJ Banal angay gyud magmatngon

Peligrong tilimad-on maoy angayan nga ipahimangno ni AJ 'Bazooka' Banal sa dili pa siya mokatkat sa ring sa iyang pakigsangka ni Angky 'Time Bomb' Angkota sa Indonesia karong Sabado diha sa Mandaue City Sports and Cultural Complex.

Makalisang ang gikuptan nga rekord ni Angkota diin katulo lamang kini mapilde sa 20 ka away uban ang 11 ka daog pinaagi sa knockout, apan si Banal dili estranghero sa pakigharong batok sa dekalibreng mga kontra.

Gani, si Banal mikulata sa mga langyaw niyang mga kaatbang, lakip na niini ang pagpakamang niya ni Indonesian champion Ali Rochmad ug ingon man ni Thai Sing Carryboy.

Dili hinuon ikalimod nga si Angkota nagabaton og kumo nga adunay "time bomb." Timaan niini mao ang iyang pagpalukapa sa stablemate ni Banal nga si Rocky Fuentes sud lamang sa usa ka hugna.

"Fuentes is not the only ALA boxer Angkota has beaten. He is also responsible for inflicting the only loss of Donnie Nietes," matud pa ni international promoter Sammy Gello-ani, kinsa maoy nagpasiugda sa maong promosyon.

"His other prominent Filipino victims are RP light flyweight champion Sonny Boy Jaro, former WBA minimumweight champion Joma Gamboa, former PABA title-holder Marvin Tampus and Isidro Lorona sa SGG Stable," dugang pa ni Gello-ani.

Apan bisan pa man sa impresibong credential ni Angkota, nga mao sab ang kasamtangang IBF Pan-Pacific flyweight champion, si Banal wala mahadlok sa Indon niyang kaatbang

Gawas nga siya nagpanikad nga moharong batok ni Angkota, ang mga Sugbuanong fans naghinam-hinam na sab nga mosaksi sa abilidad ni Banal nga katapusang miaway dinhi niadtong Marso 18 diin iyang gipakamang si Thai Dechapol Bankluaygym sa unang hugna.

Sa main event sa maong promosyon nga giulohan og "War in the Ring", si Z Gorres makighamag batok ni Indonesian super bantamweight champion Sony Manakane sa usa ka crucial tune-up fight.