Mga tang-ang magduduwa moapil sa Cebu Holiday Spa badminton tournament

Mga tang-ang badminton players dinhi sa Sugbo ang mopakita'g aksiyon sa Cebu Holiday Spa Health and Sports Club 1st Badminton Tournament nga gitakda karong Oktubre 21-22 diha sa Holiday Spa Badminton Center sa Banilad.

Ang mga partisipante mag-ilog sa taas nga dungog sa men's double, women's double ug mixed doubles categories.

Ang elimination round motamod og single round robin format, samtang ang semifinals ug finals ipaagi og knockout system.

Aduna kini registration fee nga P500 matag magduduwa nga moduwa og usa ka entry matag event ug P600 matag magduduwa kun duha ka events ang apilan.

Karong adlawa maoy deadline pagduso sa mga entries.

Mahagdaw sa mga mananaog ning duha ka adlaw nga kompetisyon mao ang medals, trophies, gift certificates, badminton apparels ug cash prizes.

Mga kanhi ug bag-ong Philippine Team members, trainers ug varsity players sa ilang tagsa-tagsa ka mga tunghaan dili tugotang makaduwa.

Ang maong torneyo kabahin sa usa ka semanang kalihukan sa unang anibersaryo sa Holiday Spa.

Gawas sa badminton, ang Holiday Spa mopasiugda sab og nagkadaiyang sporting events sama sa spinning marathons, water polo, swimming competition, step challenge ug aerobics marathon, ug uban pa.

Alang sa dugang kasayoran, tawag sa Holiday Spa Health and Sports Club sa Gov. M. Cuenco Ave., Banilad Road, dakbayan sa Sugbo sa mga telepono (032) 2324828 / (032) 234-4791 or email at [email protected] or log on at www.holidayspa.net.