Orange Team naka-ikyas sa Blue Team

Nakalahutay sa pinatyanay nga duwa ang Orange Team aron pag-angkon sa 66-62 nga kadaugan batok sa Blue Team sa Forty Aces 2006 Christmas Basketball Tournament diha sa Visayan Glass gymnasium sa barangay Guadalupe, ning siyudad.

Wala say kukaluoy nga gilubong sa Green Team ang guest team Christian Workers Basketball Association (CWBA) sa iskor nga 101-84.

Ang Orange Team mipahimulos sa 12 puntos nga labaw sa katapusang singko minutos sa duwa, apan ang Blue Team nakamaneho pagpahiyos sa labaw, gani nakalabaw pa kini og uno punto sa nahabiling uno minutos sa duwa pinaagi sa paningkamot nilang Mario Bihag ug Jimmy Ortiz.

Hinuon, nailog og balik sa Orange Team ang labaw kortesiya ni Bando Espinosa sa katapusang 27 segundos sa fourth quarter.

Sa laing bahin, gilat-an og maayo sa Green Team ang guest team CWBA ubos sa kombinasyon nilang Paul Abais ug Bordsd Basalo nga nagkumboya og 50 puntos aron paghatag kasiguroan sa kadaugan sa Green Team.

Sa pasiunang duwa, ang Gold Team nakasinati sa ilang unang kapildihan, 66-70 gikan sa mga kamot sa laing guest team, ang M-26 Dribblers ni Visayan Glass owner Henry Chu.

Ang 2006 Christmas Basketball Tournament nga gibuksan niadtong miaging Sabado maoy ikatulo nga conference nga gipahigayon sa Forty Aces Sports Team. Ang opening ceremony gitambongan ni kanhi Cebu City Sports Commission chairman Jonathan Guardo, kinsa maoy pinasidunggang dinapit ug mamumulong.