Ayaw'g kompiyansa

Gipahimangnoan ni Rocky Fuentes sa ALA Boxing Club ang iyang higala ug stablemate nga si AJ 'Bazooka' Banal nga dili kini angayan mokompiyansa ni Angky Angkota sa Indonesia gumikan kay kusog kaayo kini og kumo.

Si Fuentes nakatilaw sa labing pait niyang kapildihan sa iyang career sa mga kamot ni Angkota, nga mipalukapa kaniya sud lamang sa usa ka hugna niadtong Mayo 7, 2005 didto sa RCTI Studio sa Jakarta, Indonesia.

Nagkanayon si Fuentes nga atol sa ilang away, mobuhi na unta siya og left hook, apan naunhan siya sa right uppercut ni Angkota nga maoy nakapawong sa iyang panan-aw.

"Nataymingan lang gyud ko pero kusog kaayo siya og kumo. Human ko niya matumba, nalipong ko ug nakalimot ko nga niaway diay ko," matud pa ni Fuentes.

Miangkon si Fuentes nga kusog og kumo si Angkota ug hayan nga dili angayan nga mokompiyansa si Banal.

"Sa abilidad, maayo kaayo si Banal. Salig ko nga modaog siya, pero dili angayan nga mokompiyansa kay basin mataymingan siya sa lucky punch kusog ra ba kaayo og kumo si Angkota," asoy ni Fuentes.

Si Banal (9-0-1, 8KOs) makigharong ni Angkota (17-2 11KOs), ang IBF Pan-Pacific flyweight champion, sa supporting main event sa "War in the Ring" card karong Oktubre 21 diha sa Mandaue City Sports and Cultural Complex.

Sa main event, si Z 'The Dream' Gorres (24-1-1, 12KOs) makigtige ni Indonesian champion Sonny Manakane (9-2-1, 4KOs) sa katapusan niyang tuneup sa dili pa moharong ni WBO super flyweight champion Fernando 'Cochulito' Montiel sa Mexico.