Allanic, Fuentes nagmalampuson

Duha ka batos sa ALA Stable nga sila si Robert Allanic ug Rocky Fuentes miposte og managlahing kadaugan batok sa Hapon nilang mga kaatbang sa miaging adlaw didto sa IMP Hall sa Osaka, Japan.

Si Allanic mipukan ni Kiroaki Kusunok pinaagi sa TKO sa ikawalong hugna sa ilang kumbati ubos sa super flyweight division, apan si Fuentes gipaningot una og bogbog sa wala pa maka-eskapo gikan sa mga kamot ni Yuki Nasu pinaagi sa split decision.

Si Allanic nagbitbit na karon og 15-1 win-loss record uban ang 7KOs, samtang si Fuentes miinat sa iyang baraha ngadto sa 16-5-2 (10KOs).

Wala sab magpabitin sila si Philippine Boxing Federation (PBF) lightweight champion JR Sollano (9-5, 7KOs) ug Louie Bantigue (11-5-4, 4KOs) nga mipakaging sa ilang mga kontra pinaagi sa knockout sa unang hugna.

Si Sollano mipakamang ni Hayato Takabayashi, samtang si Bantigue mitumba nila Satoru Uchida.

Apan sila si RP lightweight champion Dexter Delada ug Philippine flyweight champion Federico Catubay wala makadala og daog human kini mapilde batok sa tagsa-tagsa nila ka mga kaatbang.

Si Delada gipalukapa sa ikaduhang hugna ni Koji Samejima, samtang si Catubay napukan ni Hiroyuki Hisataka pinaagi sa unanimous decision.