Gipaabot mosalmot sa opening ceremonies mao sila si Nestle Philippines, Inc. top executives Michele Calo ug Pat Goc-ong, DepEd regional director Dr. Carolino Mordeno, regional PESS chief Dr. Vivian Ginete ug Cebu City Schools division superintendent Dr. Leonilo Oliva.
Kagahapon, miabot na sa 84 ka tunghaan ang nakaparehistro sa secondary division ug 75 sa elementary division.
Ang mga tunghaan gikan sa dakbayan sa Sugbo maoy adunay kinabag-ang entries sa elementary ug secondary divisions. Aduna kini 48 ka tunghaan nga mobanat sa secondary division ug 51 alang sa elementary division.
Lain pang mga tunghaan nga mokumbati ubos sa secondary mao ang Mandaue City (8) Lapu-Lapu City (5), Talisay City ug Toledo City nga adunay tagtulo, Liloan, Dumanjug ug Minglanilla nga adunay tagduha ug usa sa Medellin, Balamban, Argao, Bogo ug San Fernando.
Ang Bohol girepresentahan sa Grace Christian School, Southern Leyte uban sa Maasin City National High School ug St. Joseph College of Maasin City.
Sa elementary division, ikaduha gihapon ang Mandaue City nga adunay walo ka entries, Lapu-Lapu (4), Consolacion ug Carcar adunay tagduha ug usa sa Balamban, Medellin ug Liloan.
Sa laing bahin, si Milo Little Olympics Most Outstanding Athletes recipients Elona Dane Siso sa table tennis maoy modagkot sa urna ug si Sally Mae Siso sa tennis maoy mangulo sa oath of sportsmanship.
Highlight sa opening karong adlawa mao ang selection sa Miss Milo Little Olympics 2006 ug cheerdance contest.
Adunay 28 ka mga kandidata ang mag-ilog sa titulo sa elementary level ug 17 sa high school level, samtang ang cheerdance adunay 16 entries gikan sa duha ka dibisyon.