Agbay sisters mikabkab og silver medals

Managsuong Agbay nga sila si Mary Evangeline ug Mary Stephanie sa Sugbu mikabkab og duha ka silver medals sa bag-o lang natapos nga World Junior Wushu Championships didto sa Kuala Lumpur, Malaysia.

Si Mary Evangeline, ang manghod sa duha, miangkon og silver sa southern fist (nanquan) event, samtang si Mary Stephanie mitapos sa ikaduhang dapit sa sword play (taiji).

Sa kinatibuk-an, ang Philippine junior wushu team nakahakot og walo ka medalya, lakip na niini ang bulawan nga nakabkab ni Francesa Ysabel Bernasconi sa spear play Group B competition.

Gawas sa managsuong Agbay, nakadaog sab og silver si Marianne Mariano sa Baguio City sa sanshou event.

Mitunol og bronze medal sa nasud mao sila si Henson See (cudgel play), Steven Luis Ngo (spear play), Daniel Parantac sa Baguio City (taiji sword play) ug Ruel Catalan sa Iloilo (sanshou).

"The result of the competition is a very encouraging. This will inspire us to work harder so that we can maintain our status in the region," matud ni Lester Pimentel, ang development committee chairman sa Wushu Federation of the Philippines.