Request sa texter

Usa ka magbabasa niining ubos kong lindog mi-text nga nagkanayon: "Good day. Usa ko sa nagsunod niining imong column bahin sa billiard sukad pa kaniadto. Ganahan kaayo ko kay makakuha ta'g technique sa dula. Dihang nakatrabaho na ko, panagsa na lang ko kabasa og Banat News. Kada Domingo na lang. Abi ko'g wala na ning imong kolumn kay wa may Magbilyar Ta kun Sunday. Until lately, akong cousin nakapalit og new nga Saturday issue. Akong nasayran nga naa pa diay ang imong kolumn about billiard. Di ba puwede naa say Sunday issue ani nga column? Mangayo sad unta ko'g picture nimo nga naay dedication sa luyo. Sa katapusan, hinaut nga imong i-feature kanunay si Antonio Gabica. Thanks." -- 0906-9755011

* * *

Daghang salamat sa imong text nga nakapatambok sa akong kasingkasing. Nakadugang kini sa akong kadasig sa pagpadayon niining maong lindog bahin sa billiard. Bahin sa imong hangyo nga may Sunday issue na ang atong lindog, dili ko makapasalig nimo niana. Kini tungod sa kakulang nato sa espasyo. Saksi ko sa paningkamot sa editor nga dili mataktak ang mga regular columns sa Banat News apan usahay dili kalikayan tungod sa kadaghan sa mosulod nga mga ads. Mao pod kini ang hinungdan nga kada Martes, Huwebes ug Sabado na lang ang Magbilyar Ta.

* * *

Bahin sa imong hangyo nga magbaton og hulagway nako nga may dedication sa luyo, ako una kining hunahunaon kun mohatag ba ko. Wala pa man gud ko makasulay og hatag sa akong hulagway ngadto ni bisan kinsang magbabasa bisan daghan na ang mihangyo niini kanako. Bahin hinuon sa ikatulo nimong request, ikapasalig ko kanimo nga matag karon ug unya akong histugan dinhi sa akong lindog si Antonio 'Gaga' Gabica. Hatagan ko ikaw og update mahitungod sa mga torneyo nga iyang giapilan. Dili hinuon sa matag gula nga maghisgot kita kaniya kay puol man sab. Basta kay hisgutan gyud nako si Gabica tungod ug alang kanimo ug sa tanan niyang mga fans.

* * *

Tuod diay, kun adunay mga billiard tournaments nga ipahigayon sa tagsa-tagsa ninyo ka lokalidad nga gusto ninyong masayran sa tanan, mahimo ninyong ipadangat ang inyong pahibalo dinhi sa akong lindog aron ato kining ikapahibalo ngadto sa publiko. Pinaagi niini, mas daghan unya ang makasalmot sa torneyo.

Paabongi lang ang pagpadangat sa pahibalo. Labing maayo mga usa ka semana sa dili pa ang torneyo, inyo na kanang ikapahibalo kanako kay advance ra ba ang atong paghikay niining lindog. Mao nga kun mas masayo ang pahibalo, mas maayo aron seguradong ma-accomodate nato kana.

* * *

(Sugyot ug pakisayod? Text sa 0910-8105522)