Kini human nila naangkon ang 8-5 nga kadaugan batok nilang Joel Cortez ug Czar Melencion sa Cebu City Tennis Club.
Sila si Lumpayao ug Tenepre mibulhot gilayon pagsugod sa duwa aron pagposte og 5-0 nga bentaha, apan sila si Cortez ug Melencion nakapahungaw sa ilang kainit aron pagsikit sa iskor, 4-5.
Katapusang nakasikit sila si Cortez ug Melencion sa iskor nga 6-7 gumikan kay wala na mitugot sila si Lumpayao ug Tenepre nga makagukod pa.
Sa sayo pa, ang managsuong Yac nga sila si Eldon ug Eleizer sa Pardo TC nimartsa ngadto sa Class-B semifinal round human ilang gitagak sila si Boy Singson ug J. Jaromillo sa Lapu-Lapu TC sa iskor nga 8-3.
Lain pang duha ka parisan sa Pardo TC ang mi-abante sa sunod nga hugna mao sila si Elmer Yac/Richard Zabate ug Harry Abellanosa/J. Ababon.
Sila si Yac ug Zabate nipukan nilang Col. Julio Agosto ug Bong Carolino sa Southern Islands Medical Center (SIMC) TC sa iskor nga 8-4, samtang sila si Abellanosa ug Ababon nipalayas nilang Alex ug G. Gestopa sa Mantands TC sa iskor nga 8-6.
Bisan pa man sa kapildihan nilang Agosto ug Carolino, tulo pa ka batos sa SIMC ang padayong nangampanya alang sa kampiyonato.
Kini human sila si Ronnie Pacifico ug Buddy Badaug nipakgang nilang Jerome ug Alpuerto sa Dumanjug TC. Nagmadaugon sab silang Wendell Orcullo ug Vince Acasio ug ingon man silang Bryan ug Jerry Abad.
Sa ilang bahin, ang La Paloma TC niduso og dugang duha ka batos niini ngadto sa sunod nga hugna pinaagi sa kombinasyon nilang Titing Sayson/Antonio Beltran ug Mike Bacalso/Erwin Yac.
Wala sab magpabitin si Provincial Board member Raul Bacaltos ug Jun Luminarias sa Talisay TC nga nikulit og kulbahinam nga kadaugan batok nilang Romy Pinote ug Ahong Chan sa Lapu-Lapu City TC, 8-7 (7-3).