Pagdasig sa mga babayeng bilyarista

Namatud-an na nato nga dili lang ang mga lalaking Pinoy maoy may lapad nga katakos mahitungod sa dulang billiard kondili lakip na usab ang mga babaye. Mao nga angay natong dasigon ang mga babayeng bilyarista sa Pilipinas sa pagbakyaw sa ilang tako aron mosanay ang mga kalitaw sa sama kang Rubelin Amit.

Makapadasig kaayo alang sa mga babaye nga mahiligon sa billiard sport ang kinabuhi ug career ni Angelica Paglia. Si Paglia usa sa labing respetadong woman cue artist sa Estados Unidos. Gawas nga usa ka banggiitang magdudula, billiard columnist usab siya sa website nga Azbilliards.com.

Isip usa ka babayeng bilyarista, nakasugat si Paglia og daghang kakulian nga posibleng makababag sa iyang tinguha pagsalmot sa nagkadaiyang torneyo. Usa na niini ang iyang kaakohan isip asawa ug inahan. Sa laktod, ang iyang pamilya. Apan nakakita ra gihapon siya'g paagi aron dili mahimong babag ang iyang pamilya sa iyang pagpadayon sa iyang career.

* * *

Ang una niyang gibuhat mao ang pagbahin sa iyang panahon. Time management, matud pa. Bisan busy siya kanunay sa iyang career, wala niya isalindot ang iyang pamilya. Nakatuman gihapon siya sa iyang mga obligasyon.

Panahon sa pagsalmot sa torneyo, ang usa ka magdudula nagkinahanglan og tiningob nga konsenstrasyon. Apan lisud sa usa ka inahan ang pagsalindot sa iyang mga anak bisan sa hamubong higayon sa pagdula. Mao nga mitambag si Paglia nga kun dili ka makahimo sa paghikalimot sa imong pamilya sa higayon nga ikaw mosalmot og usa ka dakung torneyo, himoa silang inspirasyon sa imong pagsalmot aron dili sila makababag sa imong tinguha pagdaog.

* * *

Sa ingon nga paagi, makadugang sila sa imong kasibot aron maningkamot og maayo. Makakuha ka'g moral support gikan kanila. Makabaton ka'g igong kusog ug kalig-on pinaagi kanila. Mao nga kinahanglang i-uban mo ang imong mga mahal sa kinabuhi sa imong pangandoy aron ikaw magmalampuson.

Kini ang sekreto ni Paglia. Kini usab ang gibuhat sa ubang bilyaristang babaye. Ug kun sagupon ug buhaton kini sa mga babayeng bilyarista sa atong nasud, posible nga mas molambo pa ang ilang abilidad ug mas motaas ang kalidad sa ilang dinulaan nga sarang ikaindig sa abilidad sa mga babayeng bilyarista sa ubang nasud.

* * *

Mopahalipay diay ko ni Emmylou C. Gacia nga bag-o lang nakapasar sa nursing board exam. Mga pahalipay gikan usab sa iyang mga kabanay nga sila si Anallie Garcia, Sandy Garcia, Lexie Garcia sa San Pedro, Laguna ug sa tanang mga sakop sa banay'ng Garcia sa Mabini, Bohol.

* * *

(Sugyot ug pakisayod? Text sa 0910-8105522)