Andam na ang tanan alang sa Adidas Streetball Challenge

Andam na ang tanan alang sa 11th Adidas Streetball Challenge nga ipahigayon ugma diha sa Sacred Heart School-Jesuit gym.

Niabot ngadto sa 20 ka teams sa male ug female divisions ang nipadayag na sa ilang partisipasyon sa maong torneyo . Ang entries nagagikan sa walo ka tunghaan nga nagbase dinhi sa Sugbo.

Ang nipadayag sa ilang pagsalmot mao ang defending champion University of Cebu (UC), University of the Visayas (UV), University of San Jose-Recoletos (USJ-R), University of San Carlos (USC), Cebu Institute of Technology (CIT), Cebu Eastern College (CEC), University of Southern Philippines-Foundation (USP-F) ug ang host-team Sacred Heart School-Jesuit.

Kadtong gustong mosalmot sa maong torneyo unya napakyas pagparehistro sa gitakdang oras, mahimo pang makaduso sa ilang entries kutob lamang karong adlawa sa Adidas outlet sa Ayala Center-Cebu.

Adunay kinatibuk-ang 36 squads ang moduwa sa under-18 boys division ug 16 teams sa girls division.

Gitangtang sa organizers ang midget ug juniors division sa final outing sa 3-on-3 action kay wala may dibisyon alang kanila sa Asian Finals nga gitakda karong Agosto 25 didto sa Guangzhou, China.

Ang makampiyon sa Cebu leg makigsangka unya sa mga top squad sa Davao, Baguio ug Manila karong Agosto 12-13 sa Manila.

Ang mga partisipanteng koponan dinhi sa Sugbo bahinon sa nagkalain-laing brackets diin ang top squad sa matag bracket mo-abante sa ikaduhang hugna nga ipaagi og knockout system.