Bautista nagpanikad na mokatkat sa ring

Nagpanikad na si ALA boxing gym star Rey 'Boom Boom' Bautista nga mokatkat sa ring aron iyang lingawon ang mga paisano niyang Bol-anon sa Sandugo card nga giulohan og "Battle of the Undefeated' karong Sabado sa Island City Mall carpark didto sa Tagbilaran City.

Si Bautista gikatakdang makigsinukliay og kumo batok sa beteranong si Edwin Gastador sud sa tulo ka hugna nga exhibition match.

Mao kini ang labing unang higayon nga si Bautista mopakita sa iyang abilidad sukad siya na-ospital tungod sa virus infection nga maoy nakapa-aghat niya pagsibog sa iyang away batok ni Alejandro Felix Montiel sa undercard sa kumbati nilang Manny Pacquiao ug Oscar Larios niadtong Hulyo 2 didto sa Araneta Coliseum.

"Gusto na gyud kaayo ko nga mosaka sa ring ug mopakita og mga away alang sa mga paisano nakong Boholano," matud pa ni Bautista. "Mapasalamaton kaayo ko sa ilang suporta diri nako ilabi na kadtong wala ko maka-away ni Felix Montiel niadtong Hulyo 2," dugang pa niya.

Sukad mibalik ang iyang kalagsik, si Bautista mibalik dayon sa makuti niyang ensayo agi'g pangandam sa umaabot niyang away didto sa Amerika sa undercard sa rematch nilang Marco Antonio Barrera ug Rocky Juarez karong Septiyembre 16 didto sa MGM Grand Hotel and Casino sa Las Vegas.

Sa main event sa "Battle of the Undefeated," nga usa sa mga kalihukan nga gihanhay sa Sandugo festival, laing Bol-anon nga si Alex John 'AJ' Banal, kinsa usa sa mga kandidato nga mamahimong world champion moharong sa walay pildeng Indonesian flyweight champion Ali Rochmad sa 10 ka hugna nga non-title fight.

Aduna say special attraction diin ang Hawaii-based boxer nga si Van Oscar Penovaroff makigharong ni Fernando Otik sa Mandaue City.

Mopakita sab og aksiyon ang batan-ong pambato sa ALA Stable nga sila si Along Denoy, Robert Allanic ug Rey Caitom nga makigtakos batok nilang Alex Guevarra, Danilo Peña ug Ruel Lagonero.

Sila si kanhi Philippine Olympic team members Franklin Albia, Mark Jason Melliguen ug Lito Jalnaiz makigsangka sab batok sa tagsa-tagsa nila ka mga kaatbang gikan sa Manila ug Mindanao.

Lain pang mga Bol-anon nga mopakita sa ilang abilidad mao sila si Arnel Tadena vs. Rodel Lamela sa Surigao City, Leon Maratas vs. Esmael Mala ug Ricky Sismundo vs. Jun Morano.

Ang Sandugo boxing festival gipasiugdahan sa hiniusang puwersa sa SGG Sports Promotions ni international promoter Sammy 'Don King' Gello-ani, sa kagamhanan sa Tagbilaran ubos sa liderato ni Mayor Dan Neri Lim ug Island City Mall.