Alertong utok

Sa dulang bilyar, gikinahanglan uyamot ang kaigmat sa pagbantay sa tanang posibleng mahitabo ibabaw sa lamesa. Kinahanglan nga ang magdudula may katakus sa pagbanabana sa mahitabong kausaban sa plastada sa mga bola ibabaw sa billiard table human ikapahigayon ang usa ka partikular nga tayada. Mohaom ba kini sa akong preparasyon? Dili ba kini makahatag og opening alang sa preparasyon sa kontra? Mao kini ang mga pangutana nga kinahanglang mahatagan og tubag sa magdudula sa dili pa siya mohuyad sa tako aron pagtira.

* * *

Kinahanglan nga alerto kanunay ang iyang utok. Mabinantayon aron dili maka-take advantage ang kontra. Kutob sa mahimo, dili hatagan og higayon ang kontra nga makabentaha. Mao kini ang sekreto sa epektibong pagdula. Angay isilsil kanunay sa alimpatakan nga sa usa ka sayop nga lakang (one false move) mahimong madiskaril ang gihikay nga preparasyon sa dula. Ang pagsuhid sa ibabaw sa lamesa uban ang pag-analyze sa plastada sa mga bola makahatag na og igong ideya kun sayop o husto ba ang nahuna-hunaang buhaton. Kana lagi kun ang magdudula may katakus sa pagbasa sa plastada sa mga bola sa ibabaw sa billiard table.

* * *

Ang mga eksperto sa dulang bilyar nagatudlo dili gayod angay mokompiyansa ang magdudula sa pagtuo nga maayo ang iyang preparasyon ug walay katakus ang kontra sa pagdiskaril niini. Sama nga lingin ang bola, dili usab maseguro ang mga panghitabo. Busa bastante gayod nga managana. Ang Pool and Billiard Magazine nag-ingon: "Try to be aware of potential distractions before they occur. Alert your brain." Gikinahanglan lagi ang pagkamabinantayon. Kinahanglan nga makapabarog ka nang daan og depensa sa dili pa modangat ang disgrasya. "To be forewarned is to be forearmed," matud pa. Kinahanglan nga palihokon ang utok sa tanang higayon. Kinahanglan nga ang kaaktibo niini sama sa kaaktibo sa partisipasyon sa mga mata ug kamot ngadto sa dula.

* * *

(Text at 0910-8105522)