Giants maka-focus na sa duwa

Human mikabkab og pipila ka prestihiyosong individual awards ang iyang mga batos, si Purefoods Giants head coach Ryan Gregorio mipadayag nga nabalik na karon isip sentro sa ilang atensiyon ang Gran Matador Brandy-PBA Philippine Cup Finals.

Si Gregorio miangkon nga ang Giants tensiyonado kaayo sa sayong bahin sa ilang "best-of-seven" finals series batok sa Red Bull Barako gumikan kay tulo sa ilang starting five pulos man kandidato pagka-MVP.

Karon nga hingpit nang na-ugdaw ang ilang nerbiyos, si Gregorio nagkanayon nga mahatagan na sa Giants og maayong pagtagad ang ilang ambisyon nga molangkat sa labing una nilang kampiyonato sa liga sud sa upat ka tuig.

"It's nice that the post season award is over so we can go back again to playing as a team, pretty much to what we have been doing this whole conference," matud pa ni Gregorio.

Ang Purefoods miposte og 2-0 nga bentaha sa serye, apan napilde kini sa Red Bull sa Game-3, 79-89.

Human gilampaso ang Red Bull sa Game-4, 99-81, ang Giants nagtangag na karon og 3-1 sa serye, 3-1 nga lisud na kaayong apason.

Sa higayon nga ilang mapilde pag-usab ang Red Bull sa Game-5 ugma didto sa Araneta Coliseum, mahipos na sa Purefoods sa ikaupat lamang niining All-Filipino title sa kasaysayan sa ilang prangkisa.

Si Gregorio mapasigarbuhon kaayo sa gipakitang kadasig sa iyang mga batos ilabi na sa paghakot niini og mga dagkung awards.

Si James Yap maoy giilang MVP ug iyang gipilde ang higpit niyang karibal nga iya ra sab nga teammate nga si Kerby Raymundo. Hinuon si Raymundo nag-uban ni James ug Roger Yap sa Mythical First Team.

Ang power forward sa Giants nga si Marc Pingris,kinsa kandidato sab sa MVP award, maoy gipili isip "most improved player" gawas nga naapil kini sa Mythical Second Team ug sa All-Defensive Team.

Sa laing bahin, si Gregorio mihimamak sa mga taho nga adunay mainit nga panagkaribal nga nahitabo nilang James Yap ug Raymundo alang sa MVP award.

Gibutyag ni Gregorio nga si Raymundo miboto pa gani ni James Yap isip MVP.