Osaka Iridology '86 mibuntog sa Unilink

Ang natama nga itsa ni Arturo Mata sa katapusang 12 segundos sa duwa maoy nagtuboy sa Osaka Iridology '86 ngadto sa 78-76 nga kadaugan batok sa Unilink Shipping '70s sa Game-1 sa "best-of-three" Division 1 semifinals sa San Carlos Boys High Alumni Basketball Association (SCBHABA)-Atan Guardo Cup sa miaging gabii diha sa USC North Campus gym.

Si Mata, kinsa miposte sa iyang game-high 32 puntos uban ang unom ka rebounds maoy nakabuak sa ilang panagtabla, 76-76 nga maoy pinakabulahan niya nga duwa sa iyang career.

Uban sa paggiya nilang Paul Abais ug Tata Merced, ang Batch '70s miposte sa kinatas-an nilang labaw nga 10 puntos sa ikatulong kuwarter, apan sila si Noli Romarate ug Roque Amores miarangkada sa fourth quarter aron paghatag sa Batch '86 og uno punto, 69-68.

Si Romarate mibugha og 17 puntos, samtang si Amores miamot og 12 puntos alang sa Osaka Iridology '86.

Si Abais maoy dakung nasilsil nga puntos alang sa Unilink Shipping '70s nga adunay 27, samtang sila si Gary Moriles, Joji Gelbolingo, Ausstin Rebolido nagkumboya og 36 puntos alang sa maong kapildihan.

Sa laing duwa sa semifinal, ang scoring machine nga si Lou Regidor mitiltil og 32 puntos diin ang defending SCBHABA champion B-Meg '85 milubong sa Libresse '82/'88 sa iskor nga 99-77.

Samtang ang Sirlitz '95 nakabawos sa JS Contractor '96 pinaagi sa paglubong sa iskor nga 97-78 aron paghatod sa tinaktakay nga Game-3 sa ilang kaugalingong semifinal series.