Sirlitz/Slimmers nakauna

Ang nagtuasik nga mga opensa nga gihimo sa Sirlitz/Slimmers World sa katapusang kuwarter maoy nakapukan sa Danaotel sa iskor nga 69-63 sa Game-1 sa ilang "best-of-three" final series sa 5th Thirsty Hoop Jams sa miaging gabii didto sa Bright Academy gym sa barangay Banilad.

Si Dennis Acebron mipabuhagay og 19 puntos uban sa suporta ni Marvin Padilla, kinsa miamot og 14, samtang sila si Ellery Ariate ug Jun Verano nagkumboya og 23 puntos alang sa Sirlitz, nga mi-abante og singko puntos human sa unang tunga, 31-26.

Bisan pa niini, ang dakung labaw sa Sirlitz nailog gihapon sa Danaotel dihang milusad kini og 27-17 run pagsugod sa ikaduhang kuwarter sa iskor nga 53-48.

Apan mibawos ang Sirlitz sa ikatulong kuwarter pinaagi sa pagpabuto og 21-10 run aron pagkontrolar sa duwa ngadto na sa kadaugan nga maoy nakapaabante kanila sa serye, 1-0.

Si Roland Pasaol mihipos og 20 puntos, miabag sab sila si Giovanni Belicario ug Christian Toledo . Si Belicario mipupo og 17 puntos, samtang si Toledo miamot og 16 puntos alang sa pilderong Danaotel

Sa maong kapildihan, ang Danaotel misaad nga mobawos sa Game-2 aron malugwayan pa ang ilang duwa ug maghatod ngadto sa tinaktakay nga Game-3.

Sa laing duwa, si Lito Cacapit mipadilaab og 24 puntos alang sa Petron nga mipukan sa Nature's Spring, 65-59 aron pagpahiluna sa ikatulong dapit.