Kickboxing sa Cebu Coliseum

Ang gipaabot nga engkuwentro sa kickboxing ug mixed martial arts nga ulohan og "Ground and Pound" himuon karong gabii diha sa Cebu Coliseum.

Ang maong kompetisyon nga gipasiugdahan sa Yawyan Ardigma Martial Arts Federation Inc. uban sa Ultimate Submission Fighting ug sa Cebu City Sports Commission sugdan sa alas-7:00 sa gabii.

Adunay 18 ka kulbahinam nga duwa ang nalatid ning maong kompetisyon, 10 niini pulos kickboxing ug ang pito mao ang kumbati sa mixed martial arts.

Ang Sugbuanong kampiyon nga si Adamson 'The Assasin' Torbiso sa Durex Dragon Kickboxing Club modepensa sa dungog batok ni Vicente 'Badong' Valdueza, Jr. sa Yaw-Yan Pasay Team alang sa main event.

Ang garbo sab sa Mandaue City nga si Mercito 'Guerrero' Gesta sa CMAC Kickboxing Club makigkumbati ni James 'King Solomon' Garcia sa Yaw-Yan Pasay Team.

Si James 'Bisaya' Dabon sa Yaw-Yan Ardigma Team-Cebu City makigsangka batok ni Marlito 'Diamond' Florida sa Angel Technique Club sa Mandaue City, si Dexter 'The Furious' Gadiano sa Yaw-Yan Ardigma Team-Toledo City moharong ni Rosenie Steve Sevilleno sa Wushu-Sanchou Team sa Cagayan de Oro City.

Laing magsangka sa lima ka hugna nga kickboxing mao sila si Noe 'The Freedom Fighter' Cantiveros sa Yaw-Yan Ardigma Team-Cebu City batok Michael Talines sa Wushu-Sanchou Team-Cagayan de Oro City, Titing Cabusas sa Soma Kickboxing Club-Mandaue City batok Argel Oppus sa Arcomjukai Kickboxing Club-Mandaue City, Joerex Rivera sa Soma Kickboxing Club-Mandaue City batok Walter Zaldarriagasa Muay Thai Association of the Phils.-Dumaguete City.

Sa mixed martial arts mao sila si Engie 'The Enforcer' Piloto sa Yaw-Yan Ardigma Team-Cebu City batok Pablo 'The Predator' Santillan sa Durex Dragon Kickboxing Club sa Lapu-Lapu City, Cary 'The Prince' Bullos sa Yaw-Yan Musang Team sa Lapu-Lapu City batok Jun 'The Striker' Fernandez sa Western Kickboxing Club-Talisay City, Renan 'The Loverboy' Dioso sa Yaw-Yan Ardigma Team-Bantayan, Cebu batok Leo 'The Warrior' Felesan sa Wushu-Sanchou Team-Cagayan de Oro City, Maxlito 'Hyper Eagle' Yong sa Yaw-Yan Musang Team sa Lapu-Lapu City batok Justin 'Evangelizer' Padillo sa Calma Stable-Cebu City, Edmund 'The Beast' Vergara sa Arcomjukai Kickboxing Club-Mandaue City batok Junjie 'D'Natural' Abellana sa Calma Stable-Cebu City ug Tammy 'The Jackal' Turno sa Arcomjukai Kickboxing Club-Mandaue City batok Jessie 'The Slugger' Adbada sa CMAC Kickboxing Club-Mandaue City.

Ang mga tiket nagkantidad og P200 (ringside), P150.00 (lower box), P100.00 upper box ug P50.00 alang sa general admission.