Tukmang silot ipatuman

Bug-at nga silot ang ipahamtang ngadto sa mga badlungong players, coaches ug ingon man school officials sa umaabot nga 6th Cebu Schools Athletic Foundation, Inc. (CESAFI) season nga mosikad pinaagi sa basketball event karong Hulyo 22 diha sa Cebu Coliseum.

Mao kini ang gipadayag kagahapon ni CESAFI commissioner Felix O. Tiukinhoy, Jr.

Hinuon, si Tiukinhoy mipasabot nga dili nila tuyo nga istriktohon ang pagpadagan sa liga, kondili pagtamod sa moral values sa liga.

"This (CESAFI) is a school league. This is not a commercial league. There are moral values that we have to look at and there is discipline that has to be followed. We would like to instill these values to them. If we're not going to start it in school, they might bring it to other leagues," pasabot ni Tiukinhoy.

Gipasabot ni Tiukinhoy nga dili lamang ang mga players ang magpakita og maayong gawi atol sa mga duwa, apil na sab ang mga coaches ug school officials gumikan kay usa man sa ilang tahas ang pagprotekta sa dignidad sa tagsa-tagsa nila ka mga tunghaan.

"The coaches should act as a good role models to the players. They must always preserve the dignity of their schools," matud pa ni Tiukinhoy nga nahinabi sa Banat News human sa SCOOP-Cebu forum kagahapon diha sa Baseline Restaurant.

Bisan og kinahanglan pa kini'g aprobal sa CESAFI Board, gipasiunhan na'g butyag ni Tiukinhoy ang mga silot nga ilang ipahamtang ngadto sa makalapas sa mga regulasyon sa liga.

Matud pa ni Tiukinhoy nga kun ang team mo-walkout, i-ban kini sa tibuok season ug may pakapin pang P25,000 nga multa.

Kun ang usa ka player masakpan nga miduso og peke nga dokumento, pahamtangan kini og lifetime ban. Kun may kalambigitan niini ang opisyal sa tunghaan, pamultahon kini og P10,000.

Alang sa "unsporstmanlike behavior," ang player/coach masuspenso og lima ka duwa uban sa P10,000 nga multa, samtang ang moapil sa mga kasamok sama sa rambol i-suspenso og lima ka duwa.

Sa laing bahin, andam na ang tanan sa pagsugod sa CESAFI basketball event.

Ang Don Bosco Technology Center (DBTC) Greywolves mopakita og aksiyon sa labing unang higayon sa collegiate division batok sa University of San Jose-Recoletos (USJ-R) Jaguars sa main game, samtang ang Cebu Doctors University (CDU) Women's team makigsangka batok sa University of Cebu (UC) Lady Webmasters alang sa pasiunang duwa.